అనుమానాస్పద స్థితిలో మరణించిన నటుడు రంగనాథ్‌కు తెలుగు చలనచిత్రసీమ, అభిమానులు అంతిమవీడ్కోలు పలికారు. అశ్రునివాళి అర్పించారు. శనివారం ఆయన ఆత్మహత్య పాల్పడిన విషయం తెలిసిందే. సికింద్రాబాద్ గాంధీ ఆస్పత్రిలో పోస్టుమార్టం నిర్వహించిన అనంతరం ఆయన మృతదేహాన్ని ఫిలింనగర్‌లోని ఫిలింఛాంబర్‌లో ప్రజల సందర్శనార్థం కొద్దిసేపు ఉంచారు. అనంతరం బన్సీలాల్‌పేట శ్మశానవాటికలో అంత్యక్రియలు పూర్తిచేశారు.

నవీన్ సంజయ్, తనిష్ తివారి, తన్వి మల్హర్ ముఖ్య పాత్రలో ప్రేమరాజ్ దర్శకత్వంలో బొమ్మకు క్రియేషన్స్ పతాకంపై మురళి బొమ్మకు నిర్మిస్తున్న ‘శరణం గచ్చామి’ చిత్రం ఆదివారం హైదరాబాద్‌లో ప్రారంభం అయింది. హీరో హీరోయిన్స్‌పై చిత్రీకరించిన ముహూర్తపు సన్నివేశానికి పరుచూరి వెంకటేశ్వరరావు క్లాప్ ఇవ్వగా, బొమ్మకు లక్ష్మి నరసమ్మ స్విచ్ ఆన్ చేయగా సానా యాదిరెడ్డి గౌరవ దర్శకత్వం వహించాడు.

శే్వతామీనన్ ప్రధాన పాత్రలో మహేశ్వర ఆర్ట్స్ పతాకంపై పర్స రమేష్ మహేంద్ర దర్శకత్వంలో కల్వకుంట్ల తేజేశ్వర్‌రావు రూపొందిస్తున్న ‘షీ’ (ఈజ్ వెయిటింగ్) చిత్రానికి సంబంధించిన ప్రారంభోత్సవ కార్యక్రమం హైదరాబాద్ అన్నపూర్ణ స్టూడియో ఫారెస్ట్ లొకేషన్‌లో ప్రారంభమైంది. ముహూర్తపు సన్నివేశంపై రమ్య క్లాప్ ఇవ్వగా, అనూప్‌సింగ్ కెమెరా స్విచ్ ఆన్ చేశారు. పూరి జగన్నాథ్ తొలి సన్నివేశానికి గౌరవ దర్శకత్వం వహించారు.

విజయ్‌భరత్, అశ్విని, కాంచన ప్రధాన తారాగణంగా ఎస్‌ఎస్‌సెల్యులాయిడ్స్ పతాకంపై జైశ్రీరామ్ దర్శకత్వంలో పొట్నూరు శ్రీనివాసరావు రూపొందిస్తున్న హాస్యభరిత చిత్రం ‘వినోదం 100%’. ఈ చిత్రానికి సంబంధించిన పోస్ట్ ప్రొడక్షన్ కార్యక్రమాలు జరుపుతున్నారు. సంపూర్ణేష్‌బాబు, పృధ్వీ కీలకమైన పాత్రల్లో నటిస్తున్న ఈ చిత్రానికి సంబంధించిన ట్రైలర్‌ను దర్శకుడు మారుతి విడుదల చేసారు.