జెనీవా, జూన్ 14: కాశ్మీర్‌లో మానవ హక్కుల ఉల్లంఘన జరుగుతోందని, ఈ వ్యవహారాలపై అంతర్జాతీయ విచారణ అవసరమని ఐక్యరాజ్యసమితి తొలిసారిగా ప్రకటించిన నివేదికలో పేర్కొంది. భారత్ ఆధీనంలో ఉన్న కాశ్మీర్, పాకిస్తాన్ ఆధీనంలోని కాశ్మీర్ భూభాగంలో మానవ హక్కుల ఉల్లంఘన జరుగుతోందనే అభియోగాలు ఉన్నాయని ఐక్యరాజ్యసమితి పేర్కొంది.

లక్నో, జూన్ 14: ఉత్తరప్రదేశ్‌పై ప్రకృతి పగబట్టింది. ప్రచండ గాలులు, భారీ వర్షాలకు దుమ్మూదూళి తోడై బీభత్సం సృష్టిస్తున్నాయి. రెండు రోజుల వర్షానికి 15 మంది మరణించారని, 18 మంది గాయపడ్డారని అధికారి ప్రతినిధి గురువారం వెల్లడించారు. సీతాపూర్‌లో ఆరుగురు, గోండా, కౌశాంబిలో ముగ్గురేసి, ఫైజాబాద్, హార్డోయ్, చిత్రకూట్‌లో ఒక్కరు చొప్పున మృతి చెందారు. సీతాపూర్‌లో 17 మంది, ఫైజాబాద్‌లో 11 మంది గాయపడ్డారు.

జైపూర్, జూన్ 14: ఒక తుక్కు వ్యాపారి వద్దకు అమ్మకానికి వచ్చిన పాతపేపర్లు ఉన్న సంచిలోని కట్టలో రెండు వేల ఆధార్ కార్డులు బయటపడ్డాయి. జైపూర్‌లోని జలపుర ప్రాంతానికి చెందిన తుక్కువ్యాపారి ఇమ్రాన్‌కు ఎవరో పాత పేపర్లను అమ్మారు. ఆ పేపర్లను సరిచేస్తుండగా అందులోంచి రెండు వేల ఆధార్ కార్డులు కనిపించాయి. దీంతో విస్మయం చెందిన ఆయన వెంటనే ఈ విషయాన్ని స్థానిక పోలీసులకు, ఐటి అండ్ కమ్యూనికేషన్ శాఖకు తెలియజేశాడు.

భిలాయ్ (చత్తీస్‌గఢ్), జూన్ 14: అభివృద్ధి, సంక్షేమం ద్వారానే హింసామార్గంలో వెళ్లేవారికి బదులివ్వాలని, శాంతి భద్రతలు నియంత్రించడం వల్ల ఆర్థికాభివృద్ధి వేగవంతమవుతుందని ప్రధాన మంత్రి నరేంద్ర మోదీ ఉద్ఘాటించారు. బస్తర్ ప్రాంతమంటే బాంబులు, తుపాకులు గుర్తుకు వచ్చేవని, ఈ రోజు విమాన సర్వీసులు కూడా ప్రారంభించామని ఆయన అన్నారు. గురువారం ఇక్కడ రూ.22 వేల కోట్ల అభివృద్ధి ప్రాజెక్టులను ఆయన ప్రారంభించారు.