న్యూఢిల్లీ, జూలై 14: కాంగ్రెస్ ఎంపీ శశిథరూర్ భార్య సునంద పుష్కర్ మృతి చెందిన ఢిల్లీలోని హోటల్ లీలా ప్యాలెస్ రూమ్‌కు సంబంధించి నివేదిక అంజేయాలని కోర్టు ఆదేశించింది. సునంద రూమ్ నెంబర్ 345లో అనుమానాస్పద స్థితిలో మృతి చెందింది. 2014 జనవరిలో ఈ సంఘటన చోటుచేసుకోగా అప్పటి నుంచి ఆ రూమ్ సీల్‌చేసే ఉంది. రూమ్ తెరుచుకోడానికి తమకు అనుమతి ఇవ్వాలంటూ హోటల్ లీలా ప్యాలెస్ యాజమాన్యం న్యాయస్థానాన్ని ఆశ్రయించింది.

పుదుచ్చేరి, జూలై 14: అక్రమ ఆస్తుల కేసులో బెంగళూరు పరప్పన అగ్రహారం జైలులో ఉన్న అన్నాడిఎంకె నాయకురాలు శశికళకు ప్రత్యేక సౌకర్యాలు కల్పిస్తున్న విషయాన్ని బయటపెట్టిన జైళ్లశాఖ డిఐజి డి రూపపై పుదుచ్ఛేరి లెఫ్టినెంట్ గవర్నర్ కిరణ్‌బేడీ ప్రశంసలు కురిపించారు. ‘రూప లాంటి నిజాయితీ గల అధికారులు మనకు అవసరం. యువత ఆమెను ఆదర్శంగా తీసుకోవాలి’ అని కిరణ్‌బేడీ పిలుపునిచ్చారు. రూపను ప్రశంసిస్తూ ఆమె ట్వీట్ చేశారు.

న్యూఢిల్లీ, జూలై 14: విజయ్ మాల్యాను బ్రిటన్ నుంచి ఇక్కడకు తీసుకువస్తేగాని అతనిపై ఉన్న కోర్టు ధిక్కార కేసుపై విచారణ చేపట్టలేమని సుప్రీం కోర్టు స్పష్టం చేసింది. 9వేల కోట్ల బ్యాంక్ లోన్ ఎగవేతలో నిందితుడైన విజయ్ మాల్యాను భారత్ రప్పించడానికి తీసుకుంటున్న చర్యలపై కేంద్రం సమర్పించిన నివేదికను సుప్రీం కోర్టు ధర్మాసనం పరిశీలించింది.

లక్నో, జూలై 14: ఉత్తరప్రదేశ్ పోలీసుల భద్రతా వైఫల్యాన్ని ఎత్తి చూపే విధంగా ఏకంగా అసెంబ్లీ భవనంలోపలే పేలుడు పదార్థాలు కనిపించడం సంచలనం సృష్టించింది. అసెంబ్లీ సమావేశాలు జరుగుతున్న సమయంలోనే ఈ సంఘటన చోటు చేసుకోవడంతో అందరూ ఉలిక్కి పడ్డారు.