దిల్లీ: వారణాసిలో రోడ్ షో నిర్వహిస్తూ అనారోగ్యానికి గురైన కాంగ్రెస్ పార్టీ అధ్యక్షురాలు సోనియా గాంధీ ప్రస్తుతం దిల్లీలోని ఆర్మీ రీసర్చ్ అండ్ రిఫరల్ ఆస్పత్రిలో కోలుకుంటున్నారు. మంగళవారం అర్ధరాత్రి సమయంలో ఆమె చార్టర్డ్ విమానంలో దిల్లీకి చేరుకున్నారు. జ్వరంతో బాధపడుతున్నప్పటికీ ఆమె ఆరోగ్య పరిస్థితి స్థిరంగా ఉందని కాంగ్రెస్ మీడియా ప్రతినిధి తెలిపారు.

దిల్లీ: జీఎస్‌టీ బిల్లు వల్లే పన్నుల సంస్కరణలు సాధ్యమని కేంద్ర ఆర్థికమంత్రి అరుణ్‌జైట్లీ స్పష్టం చేశారు. బుధవారం రాజ్యసభలో వస్తు, సేవల పన్ను (జీఎస్‌టీ) సవరణ బిల్లును జైట్లీ ప్రవేశపెట్టారు. చర్చను ప్రారంభించిన జైట్లీ మాట్లాడుతూ దేశంలోనే అతిపెద్ద పన్ను సంస్కరణ బిల్లు జీఎస్‌టీ అని వివరించారు. ఒకే దేశం, ఒకే పన్ను విధానం ఉండాలనే లక్ష్యంతో జీఎస్‌టీ బిల్లు రూపొందించినట్లు చెప్పారు.

దిల్లీ: యుపిలో మహిళల పట్ల హింస, అత్యాచారాలు పెరిగిపోతున్నా కేంద్ర, రాష్ట్ర ప్రభుత్వాలు ఏ మాత్రం పట్టించుకోవడం లేదని రాజ్యసభలో బిఎస్పీ అధినేత్రి మాయావతి బుధవారం తీవ్ర స్థాయిలో ఆందోళన వ్యక్తం చేశారు. యుపిలో సమాజ్‌వాదీ సర్కారుతో కేంద్రం కుమ్మక్కయిందా? అని ఆమె ప్రశ్నించారు. సామూహిక అత్యాచారాలు, హింసతో యుపిలో మహిళలకు భద్రత లేకుండా పోయిందన్నారు.

దిల్లీ: లోక్‌సభ సమావేశాలు బుధవారం ఉదయం ప్రారంభం కాగానే ఆంధ్రప్రదేశ్‌కు చెందిన ఎంపీలు మళ్లీ ఆందోళన ప్రారంభించారు. ఎపికి ప్రత్యేక హోదా కల్పించాలంటూ ప్లకార్డులు పట్టుకుని నినాదాలు ప్రారంభించారు. సభా కార్యక్రమాలకు అడ్డుతగలరాదని స్పీకర్ సుమిత్రా మహాజన్ చేసిన విజ్ఞప్తిని వారు పట్టించుకోలేదు.