శ్రీనగర్‌: పుల్వామా జిల్లా అవంతిపొరాలో ఆందోళనకారులు శుక్రవారం రెచ్చిపోయారు. భద్రతా బలగాలపైనా దాడులు చేశారు. ఆందోళనకారులను అదుపు చేసేందుకు భద్రతా బలగాలు జరిపిన కాల్పుల్లో ఓ యువకుడు మృతిచెందాడు. దీంతోఉద్రిక్త పరిస్థితులు నెలకొన్నాయి. జమ్మూకశ్మీర్‌ అల్లర్లలో ఇప్పటివరకు మృతిచెందిన వారి సంఖ్య 45కి చేరింది.

లక్నో: తనను, తన కుమార్తెను వేధింపులకు గురిచేస్తున్నారని బిఎస్‌పి అధినేత్రి మాయావతిపైన, ఆ పార్టీకి చెందిన ముగ్గురు నేతలపైన బిజెపి బహిష్కృత నేత దయాశంకర్ సింగ్ భార్య స్వాతి సింగ్ పోలీసులకు ఫిర్యాదు చేశారు. మాయావతిపై అనుచిత వ్యాఖ్యలు చేసినందుకు తన భర్త దయాశంకర్ ఇప్పటికే క్షమాపణలు చెప్పారని, అయినప్పటికీ తనను, తన 12 ఏళ్ల కుమార్తెను బిఎస్పీ కార్యకర్తలు వేధిస్తున్నారని స్వాతి ఆరోపించారు.

దిల్లీ: రాష్ట్ర విభజన ఫలితంగా సమస్యలను ఎదుర్కొంటున్న ఆంధ్రప్రదేశ్‌ను ప్రధాని మోదీ పట్టించుకోవడం లేదని కాంగ్రెస్ రాష్ట్ర వ్యవహారాల ఇన్‌చార్జి దిగ్విజయ్ సింగ్ శుక్రవారం ఆరోపించారు. ఎపి విషయంలో బిజెపికి చిత్తశుద్ధి లేదన్నారు. తమ పార్టీ ఎంపీ కెవిపి ప్రతిపాదించిన ప్రైవేటు బిల్లుకు అన్ని ప్రాంతీయపార్టీలు మద్దతు ఇవ్వగా బిజెపి మాత్రం వౌనం వహించడం దారుణమన్నారు.

లక్నో: ‘నా భర్తపై పోలీసులు కేసు పెట్టారు.. అనుచిత వ్యాఖ్యలు చేసినందుకు ఆయన క్షమాపణ చెప్పారు.. బిజెపి నుంచి ఆయనను బహిష్కరించారు.. అయినా బిఎస్‌పి అధినేత్రి మాయావతి ఇంకా శాంతించడం లేదు.. నా భర్త తలతీసే వరకూ ఆమె నిద్రపోరు..’- అంటూ దయాశంకర్ భార్య స్వాతి సింగ్ ఆవేదన వ్యక్తం చేశారు.