దిల్లీ: సినిమా థియేటర్లు, హోటళ్లు, రెస్టారెంట్లు, స్టోర్లు ఇక 24 గంటలూ వ్యాపారం చేసుకోవచ్చు. ఇక్కడ బుధవారం జరిగిన కేంద్ర మంత్రిమండలి సమావేశంలో ఈ మేరకు గ్రీన్ సిగ్నల్ ఇస్తూ కీలక నిర్ణయం తీసుకున్నారు. ఈ మేరకు షాప్స్ అండ్ ఎస్టాబ్లిష్‌మెంటు చట్టానికి సవరణ చేస్తారు. ప్రస్తుతం దేశంలో సేవారంగ సంస్థలు, భారీ ఉత్పత్తి సంస్థలకు మాత్రమే ఈ అవకాశం ఉంది.

దిల్లీ: బుధవారం ఒక్క రోజే రూ. 800 పెరగడంతో కేజీ వెండి ధర రూ. 42,910కి చేరింది. అంతర్జాతీయంగా వెండి ధర 2.54శాతం పెరిగింది. అంతర్జాతీయ మార్కెట్ల ప్రభావం, డిమాండ్‌ ఎక్కువవడంతో వెండి ధర పెరిగిపోయింది. నేడు బంగారం ధర మాత్రం స్థిరంగా ఉంది. బులియన్‌ మార్కెట్లో పది గ్రాముల బంగారం ధర రూ. 30,250గా ఉంది.

గాంధీనగర్: దిల్లీ ముఖ్యమంత్రి, ఆప్ అధినేత అరవింద్ కేజ్రీవాల్ సూరత్‌లో నిర్వహించతలపెట్టిన సభకు గుజరాత్ ప్రభుత్వం అనుమతి నిరాకరించింది. వచ్చే నెల 9,10 తేదీల్లో అరవింద్ కేజ్రీవాల్ రెండురోజుల పాటు గుజరాత్‌లో పర్యటించాలని నిర్ణయించుకున్నారు. సోమనాథ దేవాలయ సందర్శన, రైతులతో ముఖాముఖి అనంతరం ఆయన సూరత్‌లో జరిగే సభలో ప్రసంగించాల్సి ఉంది. అయితే, సూరత్‌లో సభకు అనుమతించరాదని గుజరాత్ సర్కారు నిర్ణయించింది.

దిల్లీ: జన బాహుళ్యంలో ఎంతో ప్రసిద్ధి చెందిన మెసేజింగ్ యాప్ వాట్సాప్‌ను నిషేధించలేమని సుప్రీం కోర్టు తేల్చిచెప్పింది. సమాచార హక్కు కార్యకర్తల సుధీర్ యాదవ్ వాట్సాప్‌ను నిషేధించాలని దాఖలు చేసిన పిటిషన్‌ను సర్వోన్నత న్యాయస్థానం బుధవారం తిరస్కరించింది. నేరాలు పెరగడానికి దోహదపడుతున్నందున వాట్సాప్‌ను నిషేధించేలా ఉత్తర్వులు ఇవ్వాలని సుధీర్ యాదవ్ తన పిటిషన్‌లో కోరారు.