ముంబయి, జూన్ 23: అంతర్జాతీయ యోగ దినోత్సవం రోజున యావత్ ప్రపంచమంతా ఆసనం వేస్తే, బిజెపి మిత్రపక్షమైన శివసేన మాత్రం ప్రధాని నరేంద్ర మోదీపై వ్యంగ్యాస్త్రాలు సంధించింది. భారత సంస్కృతిని ప్రతిబింబించే యోగకు అంతర్జాతీయ ఖ్యాతిని తీసుకొచ్చారంటూ ప్రశంసిస్తూనే, వాస్తవ సవాళ్లకు యోగ ఎంతమేరకు పరిష్కారం చూపుతుందని ప్రశ్నించింది.

న్యూఢిల్లీ, జూన్ 23: కేంద్ర ప్రభుత్వం ప్రతిష్ఠాత్మకంగా ప్రకటించిన ‘స్మార్ట్ సిటీ పథకం’లో చోటు దక్కించుకున్న 20 నగరాల్లో పనులను ఈ నెల 25న ప్రధాన మంత్రి నరేంద్ర మోదీ లాంచనంగా ప్రారంభిస్తారు. పుణేలో 5000 సీటింగ్ సామర్థ్యం కలిగిన శివ్ ఛత్రపతి స్పోర్ట్స్ కాంప్లెక్స్ ప్రారంభోత్సవంతో ‘స్మార్ట్ సిటీ మిషన్’ పథకం పనులు అమలులోకి రానున్నట్లు కేంద్ర పట్టణాభివృద్ధి మంత్రిత్వ శాఖ ఒక ప్రకటనలో తెలిపింది.

శ్రీనగర్: కుప్వారా జిల్లా లాలోబ్ అటవీ ప్రాంతంలో గురువారం జరిగిన ఎదురుకాల్పుల్లో ముగ్గురు ఉగ్రవాదులు హతమయ్యారు. ఉగ్రవాదులు సంచరిస్తున్నారన్న సమాచారంతో అటవీ ప్రాంతానికి పారామిలటరీ దళం సభ్యులు చేరుకున్నారు. సైనికులను చూసి ఉగ్రవాదులు కాల్పులు జరిపారు. దీంతో భద్రతాదళం నుంచి ఎదురుకాల్పులు మొదలయ్యాయి. ఈ ఘటనలో ముగ్గురు ఉగ్రవాదులు మరణించగా, పరారైన వారి కోసం సైనికులు గాలిస్తున్నారు.

దిల్లీ: ఆదాయపుపన్ను శాఖ పేర్కొన్న ‘ఉద్దేశపూర్వక ఎగవేతదారుల’ జాబితాలో ఉన్న వ్యక్తుల ఆస్తులను మాత్రమే వేలం వేస్తామని కేంద్ర ఆర్థికమంత్రి అరుణ్ జైట్లీ తెలిపారు. ఈ జాబితాలో కేవలం 60 మంది పేర్లు మాత్రమే ఉన్నాయని, చాలామంది పేర్లు ఇంకా ఉండాలన్నారు. ఆదాయపుపన్ను శాఖతో వివాదాలున్న వారిని ఆ జాబితాలో చేర్చలేమన్నారు.