పాట్నా: బిహార్ మాజీ సిఎం జితిన్‌రామ్ మాంఝీపై గయ జిల్లాలోని దుమారియా వద్ద దుండగులు ఆకస్మికంగా దాడి చేశారు. ఆయన కాన్వాయ్‌లో వెళుతున్న వాహనాలకు నిప్పు పెట్టారు. దుండగుల దాడి నుంచి మాంఝీ తప్పించుకున్నారు. మావోయిస్టుల చేతిలో హత్యకు గురైన ఎల్‌జెపి నేతల కుటుంబాలను పరామర్శించేందుకు మాంఝీ వెళుతుండగా ఈ దాడి జరిగింది. మావోయిస్టులు, దుండగుల దాడులతో ప్రస్తుతం దుమారియా వద్ద ఉద్రిక్తత ఏర్పడింది.

నైనిటాల్: ఉత్తరాఖండ్‌లోని చమోలి జిల్లాలో గురువారం మధ్యాహ్నం జీపు బోల్తాపడి అయిదుగురు టీచర్లు ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. గోపేశ్వర్ గ్రామంలో విధులు ముగించుకుని వీరంతా తమతమ నివాసాలకు జీపులో బయలుదేరారు. వేగంగా వెళుతున్న జీపు ఒక్కసారిగా పక్కకు ఒరిగి బోల్తాపడింది. మృతుల్లో నలుగురు మహిళా టీచర్లు, ఒక ఉపాధ్యాయుడు ఉన్నారు.

దిల్లీ: పర్యావరణాన్ని, మహిళల ఆరోగ్యాన్ని కాపాడాలన్న లక్ష్యంతో త్వరలో దేశ వ్యాప్తంగా 5 కోట్ల మందికి వంటగ్యాస్ కనెక్షన్లు ఉచితంగా ఇస్తామని కేంద్రమంత్రి నరేంద్రసింగ్ తోమార్ గురువారం తెలిపారు. ప్రధానమంత్రి ఉజ్వల యోజన ద్వారా 8 కోట్ల మంది మహిళలకు ఉచిత గ్యాస్ కనెక్షన్లు ఇవ్వాలని కేంద్రం నిర్ణయించిందని తెలిపారు.

చండీగఢ్: జాట్ కులస్థులతో పాటు మరో నాలుగు సామాజిక వర్గాలను బీసీ-సి జాబితాలో చేరుస్తూ హర్యానా ప్రభుత్వం జారీచేసిన రిజర్వేషన్ల చట్టంపై పంజాబ్-హర్యానా ఉమ్మడి హైకోర్టు గురువారం ‘స్టే’ మంజూరు చేసింది. ఈ ఏడాది మార్చి 29న హర్యానా అసెంబ్లీ ఆమోదించిన రిజర్వేషన్ల చట్టాన్ని సవాలు చేస్తూ భివానీకి చెందిన మురారీ గుప్తా దాఖలు చేసిన పిటిషన్‌పై హైకోర్టు విచారించి ఈ ఉత్తర్వులు జారీ చేసింది.