న్యూఢిల్లీ, ఏప్రిల్ 30: ఫ్లాట్ కొనుగోలుదారులు ఎనిమిదేళ్లుగా ఎదురు చూస్తున్న రియల్ ఎస్టేట్ చట్టం ఆదివారం నుంచి అమలులోకి వస్తోంది. కార్యాచరణ నియమాలు, నియంత్రణ అధికార వ్యవస్థ (రెగ్యులేటరీ అథారిటీ) ఏర్పాటు, పునర్వివిచారణ న్యాయ స్థానాలు (అప్పెల్లెట్ ట్రిబ్యునల్స్) పని మే 1నుంచి ప్రారంభం అవుతాయని కేంద్ర గృహ నిర్మాణం, పట్టణ పేదరిక నిర్మూలన శాఖ శనివారం ప్రకటించింది.

బళ్లారి, ఏప్రిల్ 30: కర్నాటక రాష్ట్రం చిత్రదుర్గ జిల్లాలో శనివారం తెల్లవారుజామున జరిగిన ఘోర రోడ్డు ప్రమాదంలో ఎనిమిది మంది విద్యార్థినులు సహా తొమ్మిది మంది మృతిచెందారు. చెళ్లకెర తాలూకాలో జాతీయ రహదారిపై క్రూయిజర్ వాహనాన్ని కర్నాటక ఆర్టీసీ బస్సు ఢీకొనడంతో ఈ ప్రమాదం జరిగింది. ఈ ప్రమాదంలో క్రూయిజర్ డ్రైవర్ సహా బళ్లారికి చెందిన ఎనిమంది విద్యార్థినులు మృతి చెందారు.

దిల్లీ: ఉత్తరాఖండ్‌లో రాష్టప్రతి పాలన, దేశంలో కరవుపరిస్థితులు, కుంభకోణాల పేరిట తప్పుడు ఆరోపణలు తదితర విషయాలపై నిరసన గళం వినిపించేందుకు మే 6న దిల్లీలో భారీ ఆందోళన చేపట్టాలని కాంగ్రెస్ పార్టీ నిర్ణయించింది. జంతర్ మంతర్ నుంచి పార్లమెంటు భవనం వరకూ జరిగే ర్యాలీలో కాంగ్రెస్ అధినేత్రి సోనియా, ఉపాధ్యక్షుడు రాహుల్ పాల్గొంటారు.

ముంబయి: పలు బ్యాంకులకు 9 వేల కోట్ల రూపాయల మేరకు బకాయిపడిన విజయ్ మాల్యాకు చెందిన ‘కింగ్‌ఫిషర్’ ట్రేడ్‌మార్కులు, బ్రాండ్‌లను వేలంలో కొనేందుకు ఎవరూ ఆసక్తి చూపలేదు. ఎస్‌బిఐ ఆధ్వర్యంలో 17 మంది రుణదాతలు శనివారం ఉదయం 11-30 గంటలకు ఆన్‌లైన్‌లో ఈ వేలం పాట ప్రారంభించారు. కింగ్‌ఫిషర్ బ్రాండ్‌లు, ట్రేడ్‌మార్కులకు 366.70 కోట్ల రూపాయలతో బిడ్డింగ్ ప్రారంభమైంది.