దిల్లీ: దేశంలో క్రికెట్ అభివృద్ధికి బిసిసిఐ చేసిందేమీ లేదని సుప్రీం కోర్టు ధర్మాసనం మంగళవారం ఆగ్రహం వ్యక్తం చేసింది. లోధా కమిషన్ సిఫారసులను ఎందుకు అమలు చేయడం లేదని కోర్టు ప్రశ్నించింది. స్వార్థ ప్రయోజనాల కోసమే బిసిసిఐ పనిచేస్తోందని న్యాయస్థానం వ్యాఖ్యానించింది.

గౌహతి: అస్సాం, మేఘాలయతో పాటు మరికొన్ని ఈశాన్య రాష్ట్రాల్లోని కొన్ని ప్రాంతాల్లో మంగళవారం ఉదయం భూ ప్రకంపనలు చోటుచేసుకున్నాయి. దీంతో ఇళ్లలోనుంచి జనం భయంతో బయటకు పరుగులు తీశారు. రిక్టర్ స్కేల్‌పై దీని తీవ్రత 5.4గా నమోదైంది. ఎక్కడా ప్రాణ, ఆస్తినష్టం జరిగినట్టు సమాచారం లేదు.

ముంబయి: భారత్‌కు చెందిన సుమారు 500 మంది ప్రముఖులు పన్నులు ఎగవేసి విదేశాల్లో భారీగా నల్లధనం దాచుకున్నారన్న పనామా పత్రాల పరిశోధనలో నిజానిజాలు వెల్లడి కావల్సి ఉందని ఆర్‌బిఐ గవర్నర్ రఘురామ్ రాజన్ మంగళవారం మీడియాతో చెప్పారు. పనామా పేపర్స్ లీకేజీపై సమగ్ర విచారణకు ఇప్పటికే కేంద్రం వివిధ ఏజెన్సీలతో విచారణ బృందాన్ని ఏర్పాటు చేసిందని, ఆ బృందంలో ఆర్‌బిఐ కూడా ఉందన్నారు.

ముంబయి: జీవితం దేవుడిచ్చిన అరుదైన వరం అని, ఆత్మహత్య చేసుకుని జీవితాన్ని ముగించే హక్కు మనకు లేదని బాలీవుడ్ నటి, బిజెపి ఎంపి హేమమాలిని ట్విట్టర్‌లో పేర్కొన్నారు. జీవితాన్ని సంపూర్ణంగా అనుభవించి ఆనందమయం చేసుకోవాలే తప్ప నిరాశకు కుంగిపోయి ఆత్మహత్య చేసుకోవడం సరికాదన్నారు.