న్యూయార్క్, మార్చి 24: టైమ్ మ్యాగజైన్ ఏడాదికోసారి ప్రకటించే ప్రపంచంలోని అత్యంత ప్రభావశీలురయిన వ్యక్తుల జాబితాలో చోటుకోసం పోటీ పడుతున్న వారిలో ప్రధానమంత్రి నరేంద్ర మోదీ, టెన్నిస్ స్టార్ సానియా మీర్జా, బాలీవుడ్ నటి ప్రియాంక చోప్రా ఉన్నారు. ప్రపంచంలోని అత్యంత ప్రభావశీలురయిన వంద మంది వ్యక్తుల జాబితాను టైమ్ మ్యాగజైన్ వచ్చే నెలలో ‘టైమ్ 100’ పేరిట ప్రకటించనుంది.

శ్రీనగర్, మార్చి 24: కాశ్మీర్ ముఖ్యమంత్రిగా పదవీ బాధ్యతలు చేపట్టనున్న పిడిపి అధినేత్రి మెహబూబా ముఫ్తీ రాజకీయ ప్రయాణం తన తండ్రి ముఫ్తీ మొహమ్మద్ సరుూద్ అడుగుజాడల్లోనే సాగింది. రాజకీయ నైపుణ్యాన్ని, నాయకత్వ పటిమను తండ్రి నుంచి వారసత్వంగా పుణికి పుచ్చుకున్న మెహబూబా తాజా రాజకీయ పరిణామాల నేపథ్యంలో మరింతగా నిగ్గుదేలారు.

శ్రీనగర్, మార్చి 24: జమ్మూ, కాశ్మీర్ తొలి మహిళా ముఖ్యమంత్రిగా పిడిపి అధ్యక్షురాలు మెహబూబా ముఫ్తీ బాధ్యతలు చేపట్టడానికి రంగం సిద్ధమైంది. గురువారం పీపుల్స్ డెమోక్రటిక్ పార్టీ ఎమ్మెల్యేలు మెహబూబా ముఫ్తీని తమ లెజిస్లేచర్ పార్టీ నాయకురాలిగా ఎన్నుకోవడంతో త్వరలోనే జమ్మూ, కాశ్మీర్‌లో ప్రభుత్వం ఏర్పాటయ్యేందుకు రంగం సిద్ధమైంది.

ముంబయి, మార్చి 24: శివసేన అధినేత దివంగత బాల్ థాకరేను హత్య చేయాలని లష్కరే తోయిబా అనుకొందని, అయితే ఆ పని అప్పగించిన వ్యక్తిని పని పూర్తి చేయక ముందే మహారాష్ట్ర పోలీసులు అరెస్టు చేశారని, అతను వారినుంచి తప్పించుకున్నాడని ముంబయి ఉగ్రవాద దాడులతో సంబంధం ఉందన్న ఆరోపణలపై అమెరికాలో జైలు శిక్ష అనుభవిస్తున్న పాకిస్తానీ ఉగ్రవాది డేవిడ్ హెడ్లీ గురువారం ముంబయి కోర్టుకు చెప్పాడు.