కోచి: మాజీ క్రికెటర్ శ్రీశాంత్‌ను కేరళ అసెంబ్లీ ఎన్నికల్లో పోటీ చేయించేందుకు బిజెపి వ్యూహరచన చేస్తోంది. ఈ మేరకు దిల్లీ నుంచి బిజెపి నేత ఒకరు ఫోన్‌లో శ్రీశాంత్‌ను సంప్రదించినట్లు సమాచారం. ఎన్నికల్లో పోటీ చేసే విషయమై బుధవారం తన నిర్ణయం ప్రకటిస్తానని శ్రీశాంత్ చెప్పినట్లు తెలుస్తోంది. మ్యాచ్ ఫిక్సింగ్ ఆరోపణలు రావడంతో ఆయనపై బిసిసిఐ జీవితకాలం నిషేధం విధించిన సంగతి తెలిసింది.

దిల్లీ: దేశద్రోహం కేసులో నిందితుడైన జెఎన్‌యు విద్యార్థి సంఘం నేత కన్నయ్యకుమార్ మంగళవారం ఇక్కడ కాంగ్రెస్ ఉపాధ్యక్షుడు రాహుల్ గాంధీని ఆయన నివాసంలో కలిశారు. మరో అయిదుగురు విద్యార్థి నేతలతో కన్నయ్య రాహుల్ ఇంటికి రావడం చర్చనీయాంశమైంది. బిజెపిని ఎదుర్కొనేందుకు కన్నయ్య లాంటి విద్యార్థి నేతల సహాయం తీసుకోవాలని రాహుల్ భావిస్తున్నట్లు సమాచారం.

న్యూఢిల్లీ: దేశవ్యాప్తంగా రాష్ట్ర ప్రభుత్వాలను కూల్చటం మొదలు పెట్టింది కాంగ్రెస్ అని కేంద్ర మంత్రి వెంకయ్యనాయుడు విమర్శించారు. సోమవారం ఇక్కడ ఆయన మీడియాతో మాట్లాడుతూ కేరళలో ప్రజాస్వామ్యబద్ధంగా ఎన్నికైన వామపక్ష నంబూద్రిపాద్ ప్రభుత్వాన్ని రద్దు చేసింది కాంగ్రెస్సేనని అన్నారు. 1984లో ఏపిలో ఎన్టీఆర్ ప్రభుత్వాన్ని పడగొట్టి కాంగ్రెస్ తమ వ్యక్తిని ముఖ్యమంత్రిని చేసిందని ఎద్దేవా చేశారు.

న్యూఢిల్లీ/ కొచ్చి, మార్చి 21: కేరళలో ఎన్నికల నియమావళి అమలులో ఉండగా దారిద్య్ర రేఖకు దిగువన ఉన్న 20 లక్షల కుటుంబాలకు ఏప్రిల్ ఒకటో తేదీనుంచి ఉచితంగా బియ్యం పంపిణీ చేయాలని రాష్ట్ర ప్రభుత్వం తీసుకున్న నిర్ణయాన్ని ఎన్నికల సంఘం ప్రశ్నించింది. అయిదు రాష్ట్రాలకు అసెంబ్లీ ఎన్నికల తేదీలను ప్రకటించిన మార్చి 4నుంచి ఎన్నికల నియమావళి అమలులోకి వచ్చింది.