ఢిల్లీ : ములాయంను ప్రధానిగా, రాహుల్‌గాంధీని ఉప ప్రధానిగా చేస్తే కాంగ్రెస్‌తో పొత్తుకు సిద్ధమేనని ఉత్తరప్రదేశ్ ముఖ్యమంత్రి అఖిలేష్ యాదవ్ అన్నారు. ఆయన ఢిల్లీలో జరిగిన ఓ కార్యక్రమంలో పాల్గొన్నారు. ఈ సందర్భంగా మీడియా ప్రతినిధులు కాంగ్రెస్‌తో పొత్తు అంశాన్ని ప్రస్తావించగా ఆయన పైవిధంగా స్పందించారు. కాగా ఇదే వేదికపై కాంగ్రెస్ ఉపాధ్యక్షుడు రాహుల్ గాంధీ కూడా ఉన్నారు.

చెన్నై: చెన్నైలోని ఎంఐవోటీ ఆసుపత్రిలో వైద్య సేవలందక 14 మంది మృతిచెందారు. ఆక్సిజన్‌ సిలిండర్లు, విద్యుత్‌ సరఫరా లేకపోవడంతో ఐసీయూలో చికిత్స పొందుతున్న 75 మందిలో 18 మంది రోగులు మృతిచెందారు. భారీ వర్షాల చెన్నైలోని సగం ప్రాంతాలకు గత నాలుగు రోజులుగా విద్యుత్‌ సరఫరా నిలిచిపోయిన విషయం తెలిసిందే. రహదారులపై నడుంలోతు నీరు నిలిచిపోవడంతో వైద్య సిబ్బంది కూడా ఆసుపత్రికి చేరుకోలేని పరిస్థితి నెలకొంది.

చెన్నై: కొద్ది రోజులుగా చెన్నై విమానాశ్రయం నీట మునగడంతో అరక్కోణంలోని నౌకాదళ ఎయిర్‌పోర్ట్ నుంచి పరిమిత సంఖ్యలో విమానాలు నడిపేందుకు అధికారులు చర్యలు తీసుకున్నారు. ఎయిర్ ఇండియాతోపాటు మరికొన్ని ప్రైవేటు విమానాలు హైదరాబాద్, దిల్లీ, బెంగుళూరు తదితర ప్రాంతాలకు వెళ్తాయి. విమానాలకు టిక్కెట్టు చార్జీలు కూడా తక్కువగా వసూలు చేస్తారు.

చెన్నై: ఆహార పదార్థాలు, మంచినీరు, ఇతర నిత్యావసర సరకులతో విశాఖ నుంచి బయల్దేరిన రెండు నౌకలు శుక్రవారం ఉదయం ఇక్కడికి చేరుకున్నాయి. వరద బాధితులకు సహాయం అందించేందుకు తూర్పు నౌకాదళం రంగంలోకి దిగింది. హెలికాప్టర్‌ని కూడా నౌకలో తీసుకువచ్చారు. జెమిని బోట్లు, గజ ఈతగాళ్లు, దుప్పట్లు, జనరేటర్లు కూడా ఈ నౌకలో తరలించారు.