చట్టసభలు దేనికోసం ఏర్పాటయ్యాయో, ఆ ఉద్దేశం నెరవేరడం లేదు. ఇది మన రాష్ట్ర శాసనసభ, శాసనమండలికే కాదు.. ఇతర రాష్ట్రాల శాసనసభలకు, మండళ్లకు, పార్లమెంట్‌కు కూడా వర్తిస్తుంది. చట్టసభల్లో సమర్థత కలిగిన నాయకత్వం లోపం స్పష్టంగా కనిపిస్తోంది.

చట్ట సభల్లో నాణ్యమైన చర్చ జరగాలి. మన రాష్ట్ర అసెంబ్లీ అనే కాదు లోక్‌సభ, రాజ్యసభల్లో సైతం ఇటీవల కాలంలో రోజుల తరబడి వివాదాలే తప్ప చర్చలు సాగడం లేదు. కొన్ని రాష్ట్రాల్లో చట్టసభలు జరుగుతున్న తీరు బాధ కలిగిస్తోంది. చట్ట సభల్లో ప్రమాణాలతో కూడిన చర్చలు జరగాలంటే సభ్యులందరి సహకారం అవసరం.

సభలో వివిధ అంశాలపై సభ్యులు అవగాహన పెంపొందించుకోవాల్సిన అవసరం ఉంది. దీనికోసం అన్ని రాజకీయ పార్టీలు శాసనసభకు పంపించే తమ సభ్యులకు అవగాహన కల్పించాలి. ఏయే అంశాలపై సభలో చర్చించాలన్నది వారు నిర్ణయించుకోవాలి. అప్పుడే శాసనసభలో అర్ధవంతమైన చర్చలు, ప్రజలకు ఉపయుక్తంగా ఉండే చర్చలు జరుగుతాయి.

ప్రజలకు వైద్య చికిత్స అందించడంలో ప్రభుత్వానికి చిత్తశుద్ధి కావాలి. బోధనాసుపత్రుల్లో రోగులకు నిరంతరం వైద్య సేవలు అందించేందుకు రెసిడెన్షియల్ విధానం ప్రవేశపెట్టాలని మెడికల్ కౌన్సిల్ ఆఫ్ ఇండియా సూచించినప్పటికీ, రాష్ట్ర ప్రభుత్వం పట్టించుకోవడం లేదు.