S ,7 à 8 RSCA (si SASPAS) et 6 cialis pharmacie cialis rapports de stage.

అగ్నికీలల ధాటికి భీతిల్లిన జనం

పుల్‌గావ్, మే 31: మహారాష్టల్రోని పుల్‌గావ్ ఆయుధగారంలో జరిగిన పేలుళ్ల శబ్దానికి చుట్టుపక్కలంతా దద్దరిల్లిపోయింది. సమీప గ్రామాల్లోని ఇళ్లు ఊగిపోయాంటే ధాటి ఎంత తీవ్రంగా ఉందో అర్ధం చేసుకోవచ్చు. ఆయుధగారంలో జరిగిన అగ్నిప్రమాదంలో 18మంది భద్రతా సిబ్బంది మృతి చెందగా, పలువురు గాయపడ్డారు. భూకంప వస్తే ఎలా ఉంటుందో అలాంటి భయానక పరిస్థితి చూశామని గ్రామస్తులు తెలిపారు. ఇళ్ల కిటికీలు, తలుపులు పెద్ద ఎత్తున ఊగడంతో ఏం జరుగుతుందోనన్న భయంతో బయటకు పరుగులు తీశారు. డిపో నుంచి అగ్నికీలలు ఎగిసిపడడంతో దట్టమైన పొగ గ్రామాలను కప్పేసింది.

మారేడుగొండలో చెరువు శిఖం భూమి ఆక్రమణ

పెద్దపల్లి రూరల్, మే 31: చెరువు శిఖం భూమిని ఆక్రమించడమే కాకుండా మిషన్ కాకతీయ పనులు జరగకుండా అడ్డుతగలడాన్ని నిరసిస్తు మండంలోని మారేడుగొండ గ్రామస్థులు మంగళవారం ఆందోళన నిర్వహించారు. మారేడుగొండ గ్రామ సమీపంలోని చెరువు శిఖం భూమిని కొంత మంది ఆక్రమించుకొని పంటలు సాగు చేసుకుంటున్నారు. ఇటీవల మిషన్ కాకతీయ కింద పనులు ప్రారంభించగా ఆక్రమించుకున్న భూముల్లో నుంచి మట్టి తీయకుండా ఆక్రమణదారులు అడ్డుకుంటున్నారు. ఈ విషయంలో అధికారులకు ఫిర్యాదు చేసిన పట్టించుకోక పోవడంతో ఆయకట్టు రైతులు, గ్రామస్తులు మంగళవారం ఉదయం పెద్దపల్లి-కాల్వశ్రీరాంపూర్ ప్రధాన రహదారిపై రాస్తారోకో చేపట్టారు.

అసంతృప్తిలో జడ్పీటిసిలు...

కరీంనగర్, మే 31: తమకు ప్రాధాన్యత లేదని, నిధులు కూడా రావడం లేదంటూ గతకొంతకాలంగా అసంతృప్తితో ఉన్న జడ్పీటిసిలు మంగళవారం నాటి జడ్పీ సర్వసభ్య సమావేశానికి హాజరుకాకపోవడంతో సర్వసభ్య సమావేశం వాయిదా పడింది. 10.30 గంటలకు ప్రారంభం కావాల్సిన సర్వసభ్య సమావేశం 11 గంటల వరకు వేచి ఉన్నా జగిత్యాల ఎమ్మెల్యే జీవన్ రెడ్డితోపాటు 15మంది జడ్పీటిసి సభ్యులు మాత్రమే హాజరయ్యారు. దీంతో జడ్పీ చైర్‌పర్సన్ తుల ఉమ సమావేశాన్ని గంటసేపు వాయిదా వేశారు. తిరిగి మధ్యాహ్నం 12 గంటలకు సమావేశాన్ని ప్రారంభించగా, అప్పటికీ సభ్యులు రాకపోవడంతో కోరం లేని కారణంగా సభను నిరవధికంగా వాయిదా వేస్తున్నట్లు జడ్పీ చైర్‌పర్సన్ తుల ఉమ ప్రకటించారు.

మోదీ చక్రవర్తి కాదు.. ప్రధాని

రాయ్‌బరేలీ, మే 31: ప్రధానమంత్రి నరేంద్రమోదీ తనను తాను షహన్‌షా(చక్రవర్తి)గా భావించుకుంటున్నారని కాంగ్రెస్ అధ్యక్షురాలు సోనియా గాంధీ మంగళవారం ఆరోపించారు. తన లోక్‌సభ నియోజక వర్గం రాయ్‌బరేలీలో ఆమె విలేఖరులతో మాట్లాడారు. ‘ఇలాంటి పరిస్థితిని నేనెన్నడూ చూడలేదు. ఇక్కడ ప్రధానమంత్రి ఉంటారు.. చక్రవర్తి కాదు. ఆయన దేశానికి ప్రధానమంత్రి. దేశంలో తీవ్రమైన పేదరికం ఉంది. కరవు ఉంది.. రైతులు సమస్యల్లో కొట్టుమిట్టాడుతున్నారు. ఈ సమయంలో ఇలాంటి ప్రదర్శనలు(ఎన్డీఏ సర్కారు రెండేళ్ల సంబరాలు) సరైనవని నేను భావించటం లేదు’ అని సోనియా వ్యాఖ్యానించారు.

జయహో హనుమా.. జయ జయహో

మల్యాల, మే 31: జయహో హనుమా.. జయ జయహో హనుమా.. రామదూత హనుమాన్‌కీ జైభోలో శ్రీరామ్‌కీ అంటూ హనుమాన్ హనుమాన్ నామకీర్తనలతో కొండగట్టు అంజన్న జయంతి తరలివచ్చిన కాషాయదండు వేడుకలు మారుమ్రోగాయి. ఉదయం నుండి రాత్రి వరకు అంజన్న జయంతి వేడుకల్లో 80వేలకు పైగా భక్తులు పాల్గొని స్వామివారి దర్శనం చేసుకున్నారు.

కలుషిత రక్తంతో 2234మందికి ఎయిడ్స్

న్యూఢిల్లీ, మే 31: భారత దేశంలో కలుషిత రక్తాన్ని ఎక్కించటం వల్ల గత 17 నెలల్లో 2234 మందికి హెచ్ ఐ వీ వైరస్ సోకిందని హిందూ దినపత్రిక ఓ నివేదికను వెలువరించింది. ఉత్తర ప్రదేశ్‌లో అత్యధికంగా 361 కేసులు ఇలాంటివి నమోదయ్యాయని ఆ నివేదికలో పేర్కొన్నారు. గుజరాత్‌లో 292 కేసులో, మహారాష్టల్రో 272, ఢిల్లీలో 264 కేసులు నమోదయ్యా యి. జాతీయ ఎయిడ్స్ నియంత్రణ సంస్థ (నాకో)కు సమాచార హక్కు కార్యకర్త చేతన్ కొఠారీ దాఖలు చేసిన దరఖాస్తుకు సమాధానంగా ఈ సమాచారాన్ని నాకో వెల్లడించింది. బడ్జెట్ కోత వంటి కారణాల వల్ల ఎయిడ్స్‌పై చైతన్య కార్యక్రమాలను ప్రభుత్వం తగ్గించింది. ఇది చాలా తీవ్రంగా పరిగణించాల్సిన అంశం.

జరిమానా కట్టాల్సిందే

న్యూఢిల్లీ, మే 31: ఆధ్యాత్మిక గురువు శ్రీశ్రీ రవిశంకర్‌కు చెందిన ఆర్ట్ ఆఫ్ లివింగ్ సంస్థకు గ్రీన్ ట్రిబ్యునల్‌లో గట్టి ఎదురుదెబ్బ తగిలింది. ఇటీవల తాము మూడు రోజుల పాటు నిర్వహించిన ప్రపంచ సాంస్కృతిక సమ్మేళనం వల్ల ఢిల్లీలోని యమునా నది ఒడ్డుకు ఎలాంటి నష్టమూ వాటిల్లలేదంటూఆ సంస్థ చేసిన వాదనను తిరస్కరించిన గ్రీన్ ట్రిబ్యునల్, నష్టపరిహారంగా చెల్లించాల్సిన మిగతా 4.75 కోట్లు చెల్లించాలని మంగళవారం ఆదేశించింది. ఈ రోజు సాయంత్రం 7 గంటల్లోగా ఆ జరిమానా సొమ్మును డిపాజిట్ చేయాలని గ్రీన్ ట్రిబ్యునల్ చైర్మన్ జస్టిస్ స్వతంత్ర కుమార్ నేతృత్వంలోని బెంచ్ ఆదేశించింది.

స్టింగ్ ఆపరేషన్ కేసులో రావత్ అరెస్టుపై స్టే

నైనిటాల్, మే 31: స్టింగ్ ఆపరేషన్‌కు సంబంధించిన సీడీ కేసులో ఉత్తరాఖండ్ ముఖ్యమంత్రి హరీష్ రావత్ అరెస్టుపై ఆ రాష్ట్ర హైకోర్టు మంగళవారం స్టే విధించింది. ఈ అంశంపై జూన్ 20వ తేదీన తదుపరి విచారణ జరుపనుంది. రావత్‌కు ప్రమేయం ఉన్న స్టింగ్ ఆపరేషన్‌పై దర్యాప్తులో భాగంగా కేంద్ర దర్యాప్తు సంస్థ (సిబిఐ) గత వారం ఆయనను ప్రశ్నించిన విషయం విదితమే. ఈ కేసు దర్యాప్తునకు రాష్టప్రతి పాలన సమయంలో ఇచ్చిన అనుమతిని ఉపసంహరించుకుంటున్నామని రాష్ట్ర ప్రభు త్వం జారీ చేసిన నోటిఫికేషన్‌ను సిబిఐ తిరస్కరించడంతో రావత్ బలవంతంగా విచారణకు హాజరుకావలసి వచ్చింది.

ప్రభుత్వ పథకాలను ప్రజల్లోకి విస్తృతంగా తీసుకువెళ్లాలి

మేడ్చల్, మే 31: రాష్ట్ర ప్రభుత్వం పేదల అభ్యున్నతి కోసం అమలు చేస్తున్న సంక్షేమ పథకాలను టిఆర్‌ఎస్ శ్రేణులు ప్రజల్లోకి విస్తృతంగా తీసుకువెళ్లాలని మేడ్చల్ ఎమ్మెల్యే మలిపెద్ది సుధీర్‌రెడ్డి పిలుపునిచ్చారు. మంగళవారం పట్టణంలోని ఓం శివసాయి ఫంక్షన్ హాల్‌లో నిర్వహించిన మేడ్చల్ మండల టిఆర్‌ఎస్ విస్తృతస్థాయి కార్యకర్తల సమావేశంలో ఎమ్మెల్యే ముఖ్యఅతిథిగా పాల్గొన్నారు. ఎమ్మెల్యే మాట్లాడుతూ గ్రామాల్లో పార్టీ పటిష్టతకు మరింత కృషి చేయాలని సూచించారు. పార్టీ అభివృద్ధికి కష్టపడి పనిచేసిన వారికి తగిన సమయంలో గుర్తింపు లభిస్తుందని చెప్పారు.

రూ.200 కోట్లతో నియోజకవర్గం అభివృద్ధి

తాండూరు, మే 31: క్షేత్రస్థాయిలో గ్రామాల పురోభివృద్ధికి తమ ప్రభుత్వం నిర్మాణాత్మక అభివృద్ధిని చేపడుతుందని రంగారెడ్డి జిల్లా చైర్‌పర్సన్ పి.సునీతా మహేందర్‌రెడ్డి అన్నారు. మంగళవారం ఆమె తాండూరు, యాలాలలో నిర్వహించిన మండల సర్వసభ్య సమావేశాలలో ముఖ్య అతిథిగా పాల్గొని ప్రసంగించారు. రాష్ట్ర మంత్రి పి.మహేందర్‌రెడ్డి ఆధ్వర్యంలో రూ.200 కోట్లతో తాండూరు నియోజకవర్గంలో సమగ్రాభివృద్ధి పనులు కొనసాగుతున్నాయని అన్నారు. ప్రతి గ్రామంలో 40వేల మొక్కలు హరితహారం రెండవ విడతను విజయవంతం చేయాలన్నారు.

Pages