వెన్నెల

కబుర్లు సరే... కలెక్షన్లు..

  • 24/04/2015
  • -త్రివేది
ఈమధ్యే హాలీవుడ్‌లో విడుదలైన ఓ రొమాంటిక్ చిత్రం కాసుల వర్షం కురిపించింది? 250కోట్ల బడ్జెట్‌తో తెరకెక్కిన ఈ చిత్రం -మూడువేల కోట్లు వసూలు చేసింది. దీన్నిబట్టి బాక్సాఫీస్ దగ్గర ఆ సినిమా కలెక్షన్లు ఎలా ఉన్నాయో అంచనా వేసుకోవచ్చు. బాక్సాఫీస్‌ను ఈ సినిమా షేక్ చేసిందంటూ మీడియా మొత్తం హైడిఫినిషన్ సౌండ్ ట్రాక్‌లో గోలచేసింది. అదే -‘్ఫఫ్టీ షేడ్స్ ఆఫ్ గ్రే’. మొన్నటి లవర్స్ డేన విడుదలై హాలీవుడ్ సహా ప్రపంచవ్యాప్తంగా కలెక్షన్ల తుపానుతో భారీ సంచలనం సృష్టించి -సినీ చరిత్రలో సరికొత్త మైలురాయిలా నిలిచింది. అయితే...? అన్ని సినిమాలూ ఒకలా ఉండవు. కలెక్షన్లలోనూ -ఒకదానితో మరోదానికి పోలికుండదు. కాకపోతే -టాలీవుడ్ కలెక్షన్ల కథ వేరు. అసలు ట్విస్టు -టాలీవుడ్‌లో ఉంది. విడుదలైన ఓ మోస్తరు ప్రతి తెలుగు సినిమా కోట్లు సంపాదించేస్తుందన్నది ఇప్పటి హాట్ టాపిక్. ప్రత్యేకత సంతరించుకున్న భారీ బడ్జెట్ సినిమాలను పక్కనపెడితే -మామూలు భారీ బడ్జెట్ సినిమా అంటే టాలీవుడ్‌లో ఎంత ఖర్చవుతుంది? దక్షిణాది, ఓవరసీస్‌లో ఎన్ని కేంద్రాల్లో విడుదలవుతుంది? ఎన్ని కేంద్రాల్లో దిగ్విజయంగా నడుస్తోంది. ఎంత కలెక్షన్లు రాబడుతోంది? అసలు తెలుగు సినిమా కలక్షన్ల స్థాయి ఎంత? సినీజనం చెబుతున్నదంతా రికార్డుల మెప్పుకోసమా? లేక భారీ వసూళ్ళు సాధ్యమవుతున్నాయా? ఈ కోట్లు ఎటుపోతున్నాయి? ఇలాంటి అర్థంపర్థంలేని ప్రశ్నలతో ప్రేక్షకుడు పిచ్చెక్కిపోతున్నాడు. నిన్న మొన్నటి పరిణామాల నుంచే -ఒక ఉదాహరణ తీసుకుందాం. కొద్దిరోజుల క్రితం భారీ అంచనాలతో తమిళ సూపర్‌స్టార్ రజనీకాంత్ హీరోగా ‘లింగా’ సినిమా పెద్దఎత్తున విడుదలైంది. విడుదల రోజు సంచలనం సృష్టించింది కూడా. మూడు నాలుగు రోజులు తిరక్కుండానే -కలెక్షన్లపై సందేహాలు ముసురుకున్నాయి. అనుమానాలూ మిన్నంటాయి. సినిమాలో రజనీ చెలరేగిపోయినట్టే -్థయేటర్ల వద్ద కలెక్షన్లూ దుమ్ము రేపేస్తాయన్న నమ్మకంతో భారీ రేటు పెట్టి డిస్ట్రిబ్యూటర్లు హక్కులు సొంతం చేసుకున్నారు. కానీ సినిమా అభిమానులను మెప్పించలేకపోయింది. రెండు మూడు రోజుల్లోనే కలెక్షన్లు ఢమాల్‌మన్నాయి. ఇప్పటికీ లింగా వివాదం తమిళనాడులో చల్లారలేదు. ఇది -లింగాను ఎత్తిచూపించే ఉద్దేశం కాదు. నిజానికి -తెలుగు సినిమా మార్కెట్ ఎలా ఉంది? అన్నది అంచనా వేయడానికే. స్టార్ హీరోల సినిమాలు మొదటి వారంలోనే అనే్నసి కోట్లు వసూలు చేస్తున్నాయా? లేక పబ్లిసిటీ మాయా? అనేది సగటు ప్రేక్షకుడికి ఇంకా అర్థంకాని ప్రశ్నగానే మిగిలింది. కొద్దిరోజుల క్రితం ప్రముఖ తెలుగు దర్శకుడు మాట్లాడుతూ -‘నిజానికి వీళ్లంతా పబ్లిసిటీ పరుగులు తీస్తున్నారు. ఆ మాయలోపడి వాళ్లను వాళ్లే మోసం చేసుకుంటున్నారన్న విషయాన్ని గమనించడం లేదు. సినిమా చేస్తున్న కలెక్షన్లకు, వీళ్ల పబ్లిసిటీ లెక్కలకూ వ్యత్యాసం లెక్కలేనంత. గుండెమీద చేయి వేసుకుని నిర్మాతలను నిజం చెప్పమనండి. వాళ్లవాళ్ల సినిమాలకు అంతంత కలెక్షన్లు వచ్చాయని’ అంటూ సూటిగా ప్రశ్నించాడు. మీడియా ముందు కోట్ల కలెక్షన్ల లెక్కలు చెబుతున్న నిర్మాతల నుంచి ఆ దర్శకుడి ప్రశ్నకు సమాధానమే లేదు. ఇటీవల ఏ వుడ్‌లో చూసినా వంద.. రెండొందలు... మూడొందల కోట్ల క్లబ్ సృష్టిస్తున్నారు. ఓ హాలీవుడ్ సినిమా విడుదలైతే ఆ సినిమా ప్రపంచవ్యాప్తంగా అన్ని దేశాల్లో విడుదలవుతుంది కాబట్టి ఆ సినిమా కలక్షన్లు కూడా భారీగానే ఉంటాయి. వాళ్లు చెప్పే లెక్కలు కరెక్టని కాదు, కానీ ఒకింత ఎక్కువ కలెక్షన్లకు విస్తృతమైన అవకాశం ఉంది. ఇక బాలీవుడ్ సినిమాను తీసుకుంటే భారత్‌తోపాటు ప్రపంచంలోని చాలా దేశాల్లో విడుదలవుతోంది. కాబట్టి ఆ సినిమా కూడా దానిస్థాయిలో వసూలు చేసే అవకాశాలు లేకపోలేదు. అమీర్‌ఖాన్ హీరోగా నటించిన పీకే చిత్రం 600 కోట్లు వసూలు చేసిందన్నది విన్నదే. నిజానికి ఆ సినిమాకు ఎంత బడ్జెట్ అయివుంటుంది. మహా అయితే 40నుంచి 50 కోట్ల మధ్యలో. కానీ వసూళ్లు అంచనా వేయలేనంత భారీగా. కాబట్టి నిజంగా ఆ సినిమా గొప్పదే! అదే తెలుగు సినిమా విషయానికొస్తే.. టాలీవుడ్ సినిమా బాలీవుడ్ ప్రమాణాలను అందుకుని, దాని తరువాతి స్థానంలో కూర్చున్నా, తెలుగు సినిమా పరిధి మాత్రం పెరగలేదు. ఇప్పటికే మన స్టార్ హీరోలు ఇంకా పూర్తిగా దక్షిణాది భాషల్లోనే మార్కెట్ పెంచుకునే ప్రయత్నమే చేయడం లేదు. దీనికి ఉదాహరణ నిన్న మొన్న హీరోగా కోలీవుడ్‌లో పరిచయమైన హీరోలు కూడా తెలుగు మార్కెట్‌పై కనే్నస్తూ.. తమిళంతోపాటు తెలుగులోనూ స్ట్రెయిట్ చిత్రాలు విడుదల చేయాలని పట్టుబడుతున్నారు. కానీ ఇప్పటికే ఇక్కడ సూపర్‌స్టార్లుగా ఉన్న మన హీరోలకు పక్కనున్న కోలీవుడ్‌లోనే సరైన మార్కెట్ లేదు. ఇదేమీ అతిశయం కాదు. దీనికితోడు తెలుగు సినిమా విడుదలయ్యే ప్రాంతాలూ తక్కువే. ఇలాంటి పరిస్థితుల్లో ఇనే్నసి కోట్ల కలెక్షన్లు ఎలా సాధ్యం? ఇక అసలు వసూళ్ళ విషయం గురించి చెప్పుకుంటే, ఈమధ్య విడుదలవుతున్న స్టార్ హీరోల సినిమాలకు భారీ ఓపెనింగ్స్ కోసం ఎక్కువ థియేటర్లలో విడుదల చేస్తున్నారు. ఒకేసారి వెయ్యికిపైగా థియేటర్లలో విడుదల చేస్తే, ఆ సినిమా మహా అయితే నాలుగైదు కూడా ఆ సెంటర్‌లో ఆడటం లేదు. సో.. ఈ నాలుగైదు రోజుల వసూళ్లే లెక్కవేయాలి. కానీ -సినీజనం మాత్రం మా సినిమాకు మొదటిరోజే అన్ని కోట్లు.. వారానికి ఇన్ని కోట్లు అంటూ భారీ పబ్లిసిటీతో ప్రేక్షకులను తికమక పెడుతున్నారు. అందులో నిజమెంత? నిజానికి ఆ సినిమాకు పెట్టిన ఖర్చయినా వచ్చిందా? లేదా అనేది ఇక్కడ అసలు ప్రశ్న? నిర్మాణం కూడా... ఇప్పుడు ఒక స్టార్ హీరోతో సినిమా నిర్మించాలంటే తడిసి మోపెడవుతుంది. ఫలానా స్టార్ హీరో అయితే ఇన్ని కోట్లు, ఫలానా క్రేజీ దర్శకుడు అయితే ఇన్ని కోట్లు.. అవీ ఇవీ అంటూ దాదాపు 30నుంచి 40 కోట్లు కేవలం సినిమా నిర్మాణానికి ఖర్చయితే, మరి ఆ సినిమా ఎంత వసూలు చేయాలి? నిజానికి సినిమా నలభై కోట్లు వసూలు చేస్తే ఆ సినిమా హిట్టయినట్టా? ఇప్పటివరకు ఏ తెలుగు సినిమా కూడా వంద కోట్ల మార్కెట్‌ను దాటలేదు. ఈమధ్యే సూర్య హీరోగా నటించిన ఓ సినిమా వంద కోట్ల మార్కెట్‌ను దాటేసింది. మరి మన టాలీవుడ్ సినిమాలు దేనికి తక్కువ? అప్పట్లో సినిమాలు రోజుల తరబడి ఆడేవి. 100, 150, 175, 200 డేస్ అంటూ... ఇప్పుడు కాలం మారింది. ఇప్పుడు ఓ సినిమా పట్టుమని పాతికరోజులు ఆడితే సినిమా సూపర్ హిట్టుకింద లెక్క. ఇలాంటి పరిస్థితుల్లో -వారం కూడా థియేటర్లలో నిలవని సినిమాలు ఇంతింత వసూలు చేయడం ఎలా సాధ్యమవుతుంది? ఇక చిన్న సినిమా అయితే అంతే. అసలు దాన్ని పట్టించుకునే నాధుడే ఉండడు. ఈమధ్య స్టార్ హీరోల సినిమాలు సూపర్ హిట్, బ్లాక్‌బస్టర్ హిట్స్ అంటూ సొంత డబ్బా వాయించుకు తిరుగుతున్నారు. నిర్మాతలను కదిపితే మాత్రం అసలు నిజాలు బయటపడుతున్నాయి. దీనికితోడు -పైరసీతోనూ వసూళ్లు మందగిస్తున్నాయి. సినిమా విడుదలైన మార్నింగ్‌షో తరువాత ఈ పైరసీ సీడీలు మార్కెట్లోకి వస్తున్నాయి. దాంతోపాటు సినిమాలను నెట్ ద్వారా డౌన్‌లోడ్ చేసుకుంటూ ఖర్చు ఎందుకు దండగ అంటూ ఇంట్లోనే చూస్తున్న ప్రేక్షకులూ ఉన్నారు. ఈ పైరసీ దెబ్బతో సినిమా వసూలు రెండో రోజుకే పడిపోతున్నాయి. ఒక సినిమా హిట్టవుతుందా? లేదా అనేది ఎవరూ చెప్పలేని విషయం. కేవలం సినిమా మీదున్న నమ్మకంతో భారీగా సినిమాను రూపొందిస్తామే కానీ, ఆ హీరో మార్కెట్‌ను దృష్టిలో పెట్టుకుని సినిమా తీస్తున్నారా? లేదు. ఓ దర్శకుడు సూపర్‌హిట్ తీశాడంటే అతడికి భారీ రేమ్యూనరేషన్ ఇచ్చి స్టార్ హీరో కాంబినేషన్‌తో సినిమా సెట్స్‌పైకి వస్తుంది. స్టార్ హీరో.. స్టార్ దర్శకుడు ఇలా సినిమాకు అంతా స్టార్ వాల్యూ ఉన్నవాళ్లే పని చేయడంవల్ల ఖర్చు కూడా స్టార్లను దాటుతోంది. తీరా సినిమా విడదలయ్యాక -చుక్కల్ని చూపిస్తుంది. ఒక సినిమాకు 40 కోట్ల బడ్జెట్ అనుకుందాం. ఆ సినిమా 60 కోట్లు వసూలు చేస్తే నిజమైన హిట్ కాదా? పోనీ అదే సినిమా కేవలం 40 కోట్లే వసూలు చేస్తే అది హిట్టా? ఇలాంటి కన్ఫ్యూజన్‌తో ఇంకా నిర్మాతలు ఎన్నో కష్టాలు భరిస్తున్నారు. పబ్లిసిటీ కోసం ప్రేక్షకులను, ఇటు అభిమానులను ఆకట్టుకోవాలని చేసే ప్రయత్నంలో వారినివారే మోసం చేసుకుంటున్నారు. ఇందులో నిజానిజాలు గ్రహిస్తే సినిమా పరిశ్రమ మరింత బాగుపడుతుంది. ఇటీవలే సూపర్‌హిట్ అంటూ చెప్పుకున్న కొన్ని సినిమాలు నిర్మాతలకు పెట్టిన ఖర్చునూ కనీసం వెనక్కి తేలేకపోయాయి. సగటు ప్రేక్షకుడికి కలక్షన్ల లాంటివి అవసరం లేదు. వారికి కావాల్సింది మంచి సినిమా. కొన్ని సినిమాల విషయంలో పంపిణీదారులు ముందుకు రావడం లేదు కనుకే సొంతంగా నిర్మాతలే విడుదల చేసుకుంటూ అటు నిర్మాతగా.. ఇటు పంపిణీపరంగా నష్టాలను మూటగట్టుకున్నారు. ఇక్కడా అందరికీ నష్టాలే వస్తున్నాయా? అని చెప్పడంకాదు. సినిమాల కలెక్షన్ల విషయంలో నిజమైన వసూలు సాధిస్తున్న సినిమాలు కేవలం 20 శాతం మాత్రమే ఉన్నాయంటే ఇక్కడి పరిస్థితి ఎలా ఉందనేది అర్థమవుతుంది. తెలుగు పరిశ్రమలో సక్సెస్ పర్సెంట్ కూడా పది శాతానికి మించి లేదన్న విషయం ఎవరిని అడిగినా చెబుతారు. వాస్తవాలను గ్రహించి కలెక్షన్ల వెంపర్లాట మానుకుని మంచి కథలపై దృష్టిపెడితే సినిమా నిర్మాణంలో మంచి ఫలితాలే రాబట్టవచ్చు.

Add new comment

X
Enter your Andhrabhoomi - Telugu News Paper Portal | Daily Newspaper in Telegu | Telugu News Headlines | Andhra Bhoomi username.
Enter the password that accompanies your username.
Loading