ఢాకా, అక్టోబర్ 13: ఆసియా కప్ హాకీ టోర్నమెంట్‌లో భాగంగా శుక్రవారం బంగ్లాదేశ్‌తో జరిగిన మ్యాచ్‌లో భారత్ 7-0 తేడాతో ఘన విజయం సాధించింది. హర్మన్‌ప్రీత్ సింగ్ రెండు (28, 47 నిమిషాలు) గోల్స్ చేయగా, గుర్జాంత్ సింగ్ (7వ నిమిషం), ఆకాశ్‌దీప్ సింగ్ (10వ నిమిషం), లలిత్ ఉపాధ్యాయ (13వ నిమిషం), అమిత్ రోహిదాస్ (20వ నిమిషం), రమణ్‌దీప్ సింగ్ (46వ నిమిషం) తలా ఒక గోల్‌ను నమోదు చేశారు.

పునే, అక్టోబర్ 13: ప్రో కబడ్డీలో శుక్రవారం జరిగిన మొదటి మ్యాచ్‌లో పునేరీ పల్టన్‌పై గుజరాత్ ఫార్ట్యూన్‌జెయింట్స్ 24 పాయింట్ల తేడాతో గెలిచింది. అద్వితీయ ప్రతిభతో విజృంభించిన సుకేశ్ హేగ్డె 15 పాయింట్లు సాధించడంతో, గుజరాత్ 44 పాయింట్లను అందుకోగలిగింది. సునీల్ కుమార్ ఏడు పాయింట్లు చేశాడు. పునేరీ పల్టన్ ఆటగాళ్లలో సురేష్ కుమార్ అత్యధికంగా ఆరు పాయింట్లు చేశాడు.

హైదరాబాద్: ఉప్పల్‌లోని రాజీవ్ గాంధీ ఇంటర్నేషనల్ స్టేడియంలో భారత్, ఆస్ట్రేలియా జట్ల మధ్య శుక్రవారం నాటి అత్యంత కీలకమైన చివరి, మూడో టి-20 ఇంటర్నేషనల్‌ను వర్షం భయం వెంటాడుతున్నది. గురువారం జల్లులు పడడంతో, ముందు జాగ్రత్త చర్యగా మైదానాన్ని కవర్లతో కప్పి ఉంచారు. కాగా, గురువారం నగరంలో పలుచోట్ల భారీ వర్షాలు కురిశాయి.

హైదరాబాద్, అక్టోబర్ 12: వచ్చేనెల ఒకటో తేదీన న్యూఢిల్లీలో న్యూజిలాండ్‌తో జరిగే తొలి టి-20 ముగిసిన వెంటనే, కెరీర్‌కు గుడ్‌బై చెప్పనున్నట్టు భారత వెటరన్ పేసర్ ఆశిష్ నెహ్రా ప్రకటించాడు. అతను రిటైర్మెంట్ చెప్తాడని బిసిసిఐ అధికారి ఒకరు పిటిఐతో మాట్లాడుతూ చెప్పిన విషయం తెలిసిందే. అదే వార్తను నెహ్రా గురువారం విలేఖరులతో మాట్లాడుతూ ధ్రువీకరించాడు.