నాగపూర్, మార్చి 13: కోల్‌కతాలో శనివారం దక్షిణాఫ్రికాతో వామప్ మ్యాచ్ ఆడిన భారత క్రికెట్ జట్టు ఆదివారం నాగపూర్ చేరుకుంది. కెప్టెన్ మహేంద్ర సింగ్ ధోనీ, ఇతర సభ్యులకు ఇక్కడి విమానాశ్రయంలో ఘన స్వాగతం లభించింది. తమ కోసం ఎదురుచూస్తున్న విలేఖరులతో మాట్లాడకుండా టీమిండియా సభ్యులు హోటల్‌కు వెళ్లిపోయారు. ఆదివారం సాయంత్రం వామప్‌లో పాల్గొన్నారు. సోమవారం నెట్స్‌కు హాజరవుతారు.

కోల్‌కతా, మార్చి 12: ఆల్‌రౌండర్, సీనియర్ ఆటగాడు షహీద్ అఫ్రిదీ నాయకత్వంలో పాకిస్తాన్ క్రికెట్ జట్టు టి-20 వరల్డ్ కప్ చాంపియన్‌షిప్‌ను ఆడేందుకు భారత్‌లో అడుగుపెట్టింది. ఈ జట్టులో 15 మంది క్రీడాకారులు, 12 మంది అధికారులు ఉన్నారు. తీవ్ర ఉత్కంఠ, అనిశ్చితి నేపథ్యంలో ఎప్పుడు ఏం జరుగుతుందోనని అభిమానులు ఆందోళన చెందారు.

పనాజీ, మార్చి 12: ఈసారి గోవా మారథాన్ ఆదివారం జరగనుండగా, ఐదు వేల మందికిపైగా రన్నర్లు, ఔత్సాహికులు పాల్గొననున్నారు. గత నాలుగు ఈవెంట్స్ మాదిరిగానే ఈసారి కూడా 21 కిలోమీటర్ల హాఫ్ మారథాన్, 10 కిలోమీటర్ల పరుగు, 5 కిలోమీటర్ల డ్రీమ్ రన్ విభాగాల్లో పోటీలు ఉంటాయి. హాఫ్ మారథాన్‌కు దేశవిదేశాల నుంచి పేరొందిన రన్నర్లు హాజరవుతారు. 10 కిలోమీటర్ల పరుగులో భారతీయులే ఎక్కువ మంది ఉంటారు.

ఇండియన్ వెల్స్ (అమెరికా), మార్చి 12: ‘సాన్‌టినా’గా అభిమానులు పిలుచుకునే మార్టినా హింగిస్, సానియా మీర్జా జోడీ ఇక్కడ ఆరంభమైన ఇండియన్ వెల్స్ పిఎన్‌బి పరిబాస్ ఓపెన్ టెన్నిస్ చాంపియన్‌షిప్ మహిళల డబుల్స్‌లో శుభారంభం చేసింది. తొలి రౌండ్‌లో వీరు కాసీ డెలాక్వా, సమంతా స్టొసుర్ జోడీని 6-3, 7-5 తేడాతో చిత్తుచేశారు.