అమరావతి, నవంబర్ 7: రాష్ట్ర వ్యాప్తంగా పర్యాటక ప్రాంతాలుగా ఆలయాలను ప్రచారంలోకి తీసుకొచ్చేందుకు ప్రయత్నిస్తున్న ప్రభుత్వం ఇందుకోసం సరికొత్త ఆలోచనను తెరపైకి తెచ్చింది. విజయవాడ కేంద్రంగా రాష్ట్రంలోని అన్ని ప్రధాన ఆలయాలకు హెలికాప్టర్ సర్వీసుల్ని అందించాలని భావిస్తోంది. ఈ హెలికాప్టర్ సర్వీసులను సమ్మిట్ ఏవియేషన్ అనే ప్రైవేటు సంస్థ నిర్వహిస్తుంది.

హైదరాబాద్, నవంబర్ 6: రెండు దశాబ్దాలుగా నత్తనడకన సాగుతున్న శ్రీశైలం ఎడమ కాలువ పనులకు ఇంతకాలానికి మోక్షం లభించింది. నవంబర్ 9న ప్రాజెక్టును నీటిపారుదల శాఖ మంత్రి తన్నీరు హరీశ్‌రావు ప్రారంభించనున్నారు. మొత్తం 80వేల ఎకరాలకు సాగునీటిని అందించే ఈ ప్రాజెక్టు పనులు 1997నుంచి మందకొడిగా సాగుతున్నాయి. తెలంగాణ ఏర్పడిన తరువాత ప్రభుత్వం పనులు వేగం పుంజుకోవటంతో నిర్ణీత సమయానికి కాలువ నిర్మాణం పూర్తయింది.

హైదరాబాద్, నవంబర్ 6: ఫ్లోరైడ్ , ఫ్లోరోసిస్ సమస్యలపై మూడు రోజుల అంతర్జాతీయ సదస్సు ఈ నెల 9వ తేదీ నుంచి 11వ తేదీ వరకు హైదరాబాద్‌లోని నేషనల్ ఇనిస్టిట్యూట్ ఆఫ్ న్యూట్రిషన్ (ఎన్‌ఐఎన్)లో జరుగుతుంది. ఇంటర్నేషనల్ సొసైటీ ఫర్ ఫ్లోరైడ్ రీసెర్చ్, ఎన్‌ఐఎన్ ఉమ్మడిగా ఈ సదస్సును నిర్వహిస్తున్నాయి. ఈ సదస్సును తెలంగాణ రాష్ట్ర వైద్య శాఖ మంత్రి డాక్టర్ సి లక్ష్మారెడ్డి ప్రారంభిస్తారు.

హైదరాబాద్, నవంబర్ 6: ‘నిజాంపై సర్దార్ వల్లభాయ్ పటేల్ ఉక్కుపాదం మోపకుండా అప్పటి ప్రధాని జవహార్‌లాల్ నెహ్రూ అడుగడుగునా అడ్డుపడ్డారు.’ అని కేంద్ర కార్మిక, ఉపాధి కల్పనా శాఖ మంత్రి బండారు దత్తాత్రేయ ఆదివారం విమర్శించారు. కాంగ్రెస్ సీనియర్ నాయకుడు, కేంద్ర మాజీమంత్రి ఎస్ జైపాల్ రెడ్డి చేసిన వ్యాఖ్యలపై ఆదివారం కేంద్ర మంత్రి దత్తాత్రేయ ఆదివారం విలేఖరుల సమావేశంలో తీవ్రంగా ప్రతిస్పందించారు.