హైదరాబాద్, మే 31: ఢిల్లీ పోలీసు విభాగంలోని సబ్ ఇనస్పెక్టర్లు, సిఎపిఎఫ్‌లు, అసిస్టెంట్ సబ్ ఇనస్పెక్టర్లు ఉద్యోగాల నియామకానికి పేపర్ -1ను మరోమారు కంప్యూటర్ ఆధారితంగా నిర్వహించాలని స్ట్ఫా సెలక్షన్ కమిషన్ నిర్ణయించింది. ఈ పరీక్షను గతంలో పరీక్షకు హాజరైన వారు మాత్రమే రాసేందుకు అర్హులు.

హైదరాబాద్, మే 31: కర్నాటకలోని బీజాపూర్‌లో నిర్వహించనున్న ఆలిండియా మజ్లిస్-ఎ-ఇతెహాదుల్ ముస్లిమీన్ (ఎఐఎంఐఎం) బహిరంగ సభకు హైదరాబాద్ ఎంపీ, ఎంఐఎం అధ్యక్షుడు అసదుద్దీన్ ఒవైసీ హాజరు కారాదని ఆ రాష్ట్ర పోలీసులు మంగళవారం నోటీసులు జారీ చేశారు. వారం రోజుల పాటు కర్నాటకకు రాకూడదని స్పష్టం చేస్తూ వారు అసదుద్దీన్‌కు దారుస్సలాంలో నోటీసులు అందజేశారు.

ఒంగోలు, మే 31: ప్రకాశం జిల్లాలో వైకాపాకు చెందిన గిద్దలూరు శాసనసభ్యుడు ముత్తుమల అశోక్‌రెడ్డి బుధవారం విజయవాడలో ముఖ్యమంత్రి నారా చంద్రబాబునాయుడు సమక్షంలో తెలుగుదేశం పార్టీలో చేరనున్నారు. అదేవిధంగా కందుకూరు శాసనసభ్యుడు పోతుల రామారావు జూన్ రెండో తేదీన ముఖ్యమంత్రి సమక్షంలో తెలుగుదేశం పార్టీ తీర్ధం పుచ్చుకోనున్నారు. ఈనేపధ్యంలో ఈ రెండు నియోజకవర్గాల్లో రాజకీయ సమీకరణలు మారనున్నాయి.

హైదరాబాద్, మే 31: రాష్ట్రం నుంచి రాజ్యసభకు జరుగనున్న ఎన్నికలు ఏకగ్రీవం కానున్నాయి. మొత్తం నాలుగు సీట్లు ఖాళీ అవగా టిడిపి నుంచి ఇద్దరు, బిజెపి, వైకాపా నుంచి ఒక్కొక్కరు ఎన్నిక కావడం ఖాయమైంది. వైకాపా నుంచి ముందు జాగ్రత్తగా పార్టీ ప్రధానకార్యదర్శి విజయసాయిరెడ్డితో పాటు, ఆయన సతీమణి కూడా నామినేషన్ వేసినప్పటికీ.. వారిలో ఒకరి ఉపసంహరణ ఖాయం కావటంతో నలుగురి ఎంపిక ప్రకటన లాంఛనప్రాయమే కానుంది.