తిరుమల, డిసెంబర్ 20: తిరుమల జెఇఓ కార్యాలయానికి దారి ఎటు అని అడిగిన ప్రశ్నకు ఆగ్రహంతో ఊగిపోయిన చిత్తూరు జిల్లా మదనపల్లెకు చెందిన ఎస్‌ఐ నాగేశ్వరరావు విజయవాడకు చెందిన ఫణికుమార్‌పై సర్వీస్ రివాల్వర్‌ను గురిపెట్టిన సంఘటన ఆదివారం ఎస్‌ఎంసి సర్కిల్‌లో చోటుచేసుకొంది. దీంతో ఆగ్రహించిన భక్తులు ధర్నాకు దిగారు. వారికి మద్దతుగా మరికొంతమంది భక్తులు చేరి పోలీసులను నిలదీశారు.

రామచంద్రపురం, డిసెంబర్ 20: దక్షిణ కాశీగా ప్రసిద్ధిచెందిన తూర్పుగోదావరి జిల్లా ద్రాక్షారామ శ్రీమాణిక్యాంబ సమేత భీమేశ్వర స్వామి ఆలయ ఉత్తర ద్వారం సమీపంలో శ్రీఅతిరుద్రం మహాయజ్ఞం ఆదివారం ఘనంగా ప్రారంభమైంది. పొట్టి శ్రీరాములు నెల్లూరు జిల్లా రాపూరు మండలం పెంచలకోన క్షేత్రం శ్రీమణిద్వీప మహాసంస్థానానికి చెందిన భగవతీ శ్రీశ్రీశ్రీ విజయేశ్వరిదేవి కరుణామయి అమ్మ చేతుల మీదుగా ఈ కార్యక్రమం ప్రారంభమయ్యింది.

రామచంద్రపురం, డిసెంబర్ 20: పున్నామ నరకం నుండి తప్పించేవాడు పుత్రుడు అంటారు... నిజంగా నరకం ఉందో లేదో కానీ, ఓ పుత్రుడు మాత్రం కన్న తండ్రి పాలిట కాలయముడయ్యాడు. నిద్రిస్తున్న తండ్రి చేతికి వైర్లు చుట్టి, విద్యుదాఘాతానికి గురిచేయడం ద్వారా హత్యచేశాడు. వళ్లు జలదరించే ఈ ఘటన తూర్పు గోదావరి జిల్లా రామచంద్రపురం పోలీస్ స్టేషన్ పరిధిలోని ఓదూరు గ్రామంలో శనివారం అర్ధరాత్రి దాటిన తరువాత చోటుచేసుకుంది.

తిరుమల, డిసెంబర్ 20: వైకుంఠ ఏకాదశి పర్వదినాన్ని పురస్కరించుకుని కలియుగ ప్రత్యక్ష దైవమైన శ్రీ వేంకటేశ్వరస్వామిని దర్శించి, వైకుంఠ ద్వార ప్రవేశం చేయడానికి వచ్చిన భక్తులతో తిరుమల కిటకిటలాడుతోంది. వీరికి సోమవారం తెల్లవారుజామున 4 గంటల నుండి ఆలయం లోపలకు అనుమతించడానికి టిటిడి చర్యలు చేపట్టింది. ముందుగా స్వామివారికి నిత్యం జరిగే సుప్రభాతం, తోమాల, అర్చన లాంటి సేవలను ఏకాంతంగా నిర్వహించనున్నారు.