శ్రీశైలం ప్రాజెక్టు, ఆగస్టు 23: వరద పెరగడంతో గురువారం శ్రీశైలం జలాశయం 8 గేట్లు ఎత్తివేసి సాగర్‌కు భారీగా నీరు విడుదల చేస్తున్నారు. బుధవారం నాలుగు గేట్లు ఎత్తి దిగువకు నీటిని విడుదల చేసిన అధికారులు రాత్రి మరో గేటు, ఇన్‌ఫ్లో మరింత పెరగడంతో గురువారం మరో మూడు గేట్లు ఎత్తారు. దీంతో మొత్తం 8 గేట్లు పది అడుగుల మేర ఎత్తి దిగువ సాగర్‌కు 3,20,063 క్యూసెక్కుల నీరు తరలిస్తున్నారు.

విజయవాడ: స్వాతంత్య్ర సమరయోధుడు, అమరజీవి టంగుటూరు ప్రకాశం పంతులుకు ముఖ్యమంత్రి చంద్రబాబునాయుడు ఘనంగా నివాళులర్పించారు. ప్రకాశం పంతులు జయంతి సందర్భంగా ముఖ్యమంత్రి చంద్రబాబు అమరావతి ప్రజావేదికలో మాట్లాడుతూ దేశ స్వాతంత్య్రం కోసం ప్రకాశం పంతులు తన కష్టార్జితాన్ని త్యాగం చేశారని అన్నారు.

విజయవాడ : రాష్ట్ర గవర్నర్‌ ఈఎస్‌ఎల్‌ నరసింహన్‌ను బిజెపి నేతలు గురువారం ఉదయం కలిసి వినతిపత్రం సమర్పించారు. భోగాపురం ఎయిర్‌పోర్టు టెండర్ల రద్దు, పీడీ అకౌంట్స్‌లో అవినీతి, అమరావతి బాండ్ల జారీలో అవినీతిపై విచారణ జరపించాలని కోరుతూ.. గవర్నర్‌కు వినతిపత్రం సమర్పించారు. కార్యక్రమంలో జీవీఎల్‌ నరసింహారావు, సోము వీర్రాజు, విష్ణు కుమార్‌రాజు, విష్ణువర్థన్‌రెడ్డి పాల్గొన్నా‌రు.

విజయవాడ :: ఉప రాష్ట్రపతి ఎం.వెంకయ్యనాయుడు గురువారం రైతులతో ముఖాముఖిగా సమావేశమయ్యారు. ముందుగా.. కృష్ణా జిల్లా హనుమాన్‌ జంక్షన్‌ నర్సింహపాలెంలో రైతులు నాడెప్‌ కంపోస్టు ద్వారా చేస్తున్న ప్రకృతి వ్యవసాయాన్ని వెంకయ్య పరిశీలించారు. అనంతరం రైతులతో ముఖాముఖిగా సమావేశమై ప్రకృతి వ్యవసాయం తీరు తెన్నులను స్వయంగా అడిగి తెలుసుకున్నారు.