నిజామాబాద్, మార్చి 20: చిన్నారులను భావిభారత పౌరులుగా తీర్చిదిద్దే గురుతర బాధ్యతను విస్మరించి, అభంశుభం ఎరుగని ఓ విద్యార్థినిని (మైనర్)కి మాయమాటలు చెప్పి లైంగిక వేధింపులకు పాల్పడిన ప్రభుత్వ ఉపాధ్యాయుడి నిర్వాకమిది. ఈ ఉదంతం బట్టబయలు కావడంతో ఆ ఉపాధ్యాయుడిపై పోలీసులు నిర్భయ చట్టంతో పాటు కిడ్నాప్, చీటింగ్ కేసులు నమోదు చేశారు. నిజామాబాద్ జిల్లా సిరికొండ మండలం రావుట్ల గ్రామంలో ఈ ఘటన చోటుచేసుకుంది.

హైదరాబాద్, మార్చి 20: అర్చకులకు ట్రెజరీల ద్వారా జీతాలు చెల్లిస్తామని ప్రభుత్వం ఎన్నడూ చెప్పలేదని, అది సాధ్యం కాదని దేవాదాయ మంత్రి ఎ ఇంద్రకరణ్ రెడ్డి చెప్పారు. ఒడితెల సతీష్‌కుమార్, దాస్యం వినయ్ భాస్కర్, మలిపెద్ది సుధీర్‌రెడ్డి తదితరులు సోమవారం నాడు శాసనసభ ప్రశ్నోత్తర కార్యక్రమంలో అడిగిన ప్రశ్నలకు మంత్రి సమాధానం ఇచ్చారు.

హైదరాబాద్, మార్చి 20: తెలంగాణ రాష్ట్ర అర్హత పరీక్ష దరఖాస్తు గడువును ఈ నెల 20వ తేదీ నుండి 27వ తేదీ వరకూ పొడిగించినట్టు అర్హత పరీక్ష సభ్య కార్యదర్శి ప్రొఫెసర్ పి యాదగిరి స్వామి తెలిపారు. 1500 జరిమానాతో ఏప్రిల్ 10 వరకూ, 2వేల జరిమానాతో ఏప్రిల్ 20 వరకూ, 3వేల జరిమానాతో మే 1వ తేదీ వరకూ దరఖాస్తులను స్వీకరిస్తామని పేర్కొన్నారు. కాగా పరీక్ష జూన్ 11న జరుగుతుందని ఆయన చెప్పారు.

హైదరాబాద్/ ఖైరతాబాద్, మార్చి 20: గొర్రెల పెంపకానికి కేంద్రం నిధులు ఇవ్వడం లేదనడం విడ్డూరంగా ఉందని జెజెపి ఎమ్మెల్యే కిషన్ రెడ్డి అన్నారు. జాతీయ స్థాయిలో వివక్ష లేకుండా అన్ని రాష్ట్రాలకు కేంద్రం సహాయం చేస్తుందని చెప్పారు. కేంద్రం నిధుల నుంచి పథకాలను అమలు చేస్తూ వాటి ప్రస్తావన చేయకపోవడం సరికాదన్నారు. కేరళ సిఎం తమ పార్టీపై తలాతోకాలేని ఆరోపణలు చేస్తున్నారని మండిపడ్డారు.