హైదరాబాద్: ప్రధాని నరేంద్ర మోదీ ఆగస్టు 7న తెలంగాణలో పర్యటించే అవకాశం ఉందని సమాచారం. మెదక్ జిల్లా గజ్వేల్‌లో మిషన్ భగీరథ కార్యక్రమాన్ని, ఆదిలాబాద్ జిల్లా పెగడపల్లిలో ఎన్‌టిపిసి విద్యుత్ ప్లాంటును మోదీ ప్రారంభిస్తారని తెలిసింది. కొద్దిరోజుల క్రితం దిల్లీ వెళ్లిన సిఎం కెసిఆర్ ప్రధానిని కలిసి తెలంగాణకు రావాల్సిందిగా విజ్ఞప్తి చేసిన సంగతి తెలసిందే.

హైదరాబాద్: నల్గొండ జిల్లాకు చెందిన కాంగ్రెస్ ఎమ్మెల్యే కోమటిరెడ్డి వెంకటరెడ్డి సోదరుడైన అనిల్‌కుమార్‌రెడ్డికి చెందిన ఇళ్లలో, కార్యాలయంలో గురువారం ఉదయం ఐటి శాఖ అధికారులు సోదాలు చేశారు. హైదరాబాద్, నల్గొండ, కాకినాడల్లో ఏకకాలంలో ఈ సోదాలు చేసి ఆస్తిపాస్తులకు సంబంధించి వివరాలను సేకరించారు.

హైదరాబాద్ : ఓల్డ్ ఎమ్మెల్యే క్వార్టర్స్లో మంత్రి జూపల్లి కృష్ణారావు నివాసం వద్ద వంటపని చేస్తున్న శరణప్ప దంపతుల కుమార్తె వైష్ణవి (5) బుధవారం మధ్యహ్నం నుంచి కనిపించడంలేదు. పాఠశాలకు వెళ్లిన చిన్నారి తిరిగి ఇంటికి రాకపోవడంతో నారాయణగూడ పోలీసులకు తల్లిదండ్రులు ఫిర్యాదు చేశారు. వైష్ణవిని 14 ఏళ్ల బాలిక తీసుకెళ్తున్నట్లు సీసీ టీవీ లో కనిపిస్తుండటంతో ఆ కోణంలో పోలీసులు దర్యాప్తు చేస్తున్నారు.

హైదరాబాద్, జూలై 20: మహాత్మా గాంధీని ఆర్‌ఎస్‌ఎస్ హత్య చేసిందని ఆరోపించిన ఎఐసిసి ఉపాధ్యక్షుడు రాహుల్ గాంధీ ఆ వ్యాఖ్యలు ఉపసంహరించుకుని, క్షమాపణ చెప్పేవరకు ఆయన్ను తెలంగాణలో అడుగు పెట్టనీయమని బిజెపి శాసనసభాపక్షం ఉప నాయకుడు ఎన్‌విఎస్‌ఎస్ ప్రభాకర్ హెచ్చరించారు. గాంధీని హత్య చేసిన నాథురామ్ గాడ్సెతో ఆర్‌ఎస్‌ఎస్‌కు ఎటువంటి సంబంధం లేదని ఎమ్మెల్యే ప్రభాకర్ బుధవారం విలేఖరుల సమావేశంలో తెలిపారు.