హైదరాబాద్: తెలంగాణ న్యాయవాదులు, న్యాయాధికారుల జెఎసి పిలుపు మేరకు బుధవారం ‘చలో హైకోర్టు’ ఆందోళనకు పిలుపు ఇవ్వడంతో పోలీసులు భారీగా మోహరించారు. హైకోర్టు వద్ద ఎలాంటి అవాంఛనీయ సంఘటనలు జరగకుండా భద్రతా ఏర్పాట్లు చేశారు. వివిధ జిల్లాల నుంచి లాయర్లు, న్యాయమూర్తులు తరలివస్తున్నందున పోలీసులు ముందు జాగ్రత్త చర్యలు తీసుకున్నారు.

దిల్లీ: కేంద్ర న్యాయశాఖ మంత్రి సదానంద గౌడను కాంగ్రెస్ ఎంపీలు రాపోలు ఆనంద భాస్కర్, పాల్వాయి గోవర్ధన రెడ్డి బుధవారం ఇక్కడ కలిశారు. హైకోర్టు విభజన, తెలంగాణలో న్యాయవాదుల ఆందోళన తదితర అంశాలపై తక్షణ చర్యలు తీసుకోవాలని వారు విజ్ఞప్తి చేశారు.

హైదరాబాద్: జీడిమెట్లలోని ఓ రసాయన గోదాములో బుధవారం ఉదయం అగ్నిప్రమాదం సంభవించి భారీగా మంటలు ఎగసిపడ్డాయి. దీంతో చుట్టుపక్కలవారు తీవ్ర భయాందోళనలకు లోనయ్యారు. సమాచారం తెలిసిన వెంటనే అగ్నిమాపక సిబ్బంది అక్కడికి చేరుకుని మంటలను ఆర్పివేశారు. ఇళ్ల మధ్య కెమికల్ ఫ్యాక్టరీలు, గొడౌన్లు ఉండడంతో తరచూ అగ్ని ప్రమాదాలు జరుగుతున్నాయని స్థానికులు ఆందోళన చెందుతున్నారు.

గోదావరిఖని, జూన్ 28: భారీ వర్షాలతో కోల్‌బెల్ట్ తడిసి ముద్దయ్యింది. సోమవారం రాత్రి నుంచి మంగళవారం సాయంత్ర వరకూ ఎడతెరపిలేని వానతో కోల్‌బెల్ట్ పారిశ్రామిక ప్రాంతం నానుతోంది. వర్షాకాలం సమీపించిన నాటినుంచి మొదటిసారిగా నిరంతరంగా వర్షం కురుస్తూనే ఉంది. సీజన్ మొదలైన దగ్గర్నుంచీ క్షణంతెరిపి లేకుండా వర్షాలు పడుతుండటంతో సింగరేణి ఓపెన్ కాస్ట్ ప్రాజెక్ట్‌ల్లో బొగ్గు ఉత్పత్తికి ఆటంకం ఎదురైంది.