మహబూబ్‌నగర్: ప్రజలపై ఆర్థిక భారం మోపేలా తెలంగాణ ప్రభుత్వం ఆర్టీసీ, విద్యుత్ ఛార్జీలను పెంచిందని కాంగ్రెస్ నేతలు విమర్శించారు. పెంచిన ధరలను తగ్గించాలని కోరుతూ వనపర్తిలో ఆ పార్టీ కార్యకర్తలు శనివారం భారీఎత్తున ధర్నా జరిపారు. పెంచిన రేట్లను తగ్గించేవరకూ తమ ఆందోళన కొనసాగుతుందని ఎమ్మెల్యే చిన్నారెడ్డి ప్రకటించారు. ఆందోళన చేస్తున్న కాంగ్రెస్ నేతలను, కార్యకర్తలను పోలీసులు అరెస్టు చేశారు.

హైదరాబాద్, జూన్ 24: దేశంలో మొదటిసారి డిగ్రీ కాలేజీల్లో ఆన్‌లైన్‌లో అడ్మిషన్లు నిర్వహించిన ఘనతను తెలంగాణ ప్రభుత్వం సాధించింది. తొలుత ఇది ఎంతో క్లిష్టమైనదని భావించిన ప్రభుత్వం తర్వాత సమస్యలను అధిగమిస్తూ ఆన్‌లైన్ అడ్మిషన్ల ప్రక్రియను ఈ ఏడాదే సాకారం చేసింది. గత నెల రోజులుగా వివిధ దశలను అధిగమించిన ఆన్‌లైన్ అడ్మిషన్లకు అలాట్‌మెంట్ లేఖలు ఇచ్చారు.

హైదరాబాద్, జూన్ 24: వర్షాకాలానికి ముందే ఆయకట్టుపై యాక్షన్ ప్లాన్ రూపొందించుకోవాలని నీటిపారుదలశాఖ మంత్రి టి హరీశ్‌రావు అధికారులను ఆదేశించారు. ఇప్పటి వరకు సరైన యాక్షన్ ప్లాన్ లేకపోవడం వల్లనే ఆయకట్టుకు నీరు అందకపోవడం వల్ల పాతికేళ్లుగా వివిధ ప్రాజెక్టుల కింద కాలువలు అత్యంత దారుణంగా తయారయ్యాయని మంత్రి అభిప్రాయపడ్డారు.

వికారాబాద్, జూన్ 24: ఆరు దశాబ్దాలుగా సాగు చేసుకుంటున్న భూములను బలవంతంగా లాక్కోడమేమిటని, తెలంగాణ రాష్ట్రంలో ఇంకా అన్యాయం జరుగుతూనే ఉందని, బంగారు తెలంగాణ అంటే ఇదేనా అని తెలంగాణ యునైటెడ్ ఫ్రంట్ అధ్యక్షురాలు విమలక్క ప్రశ్నించారు. శుక్రవారం మండలంలోని పుల్‌మద్ది అటవీ ప్రాంతంలో వివాదాస్పద భూములను ఆమె రైతులచే దున్నించారు. విషయం తెలుసుకున్న అటవీశాఖ అధికారులు అక్కడకు చేరుకుని రైతులను అడ్డుకున్నారు.