హైదరాబాద్: తెలంగాణ శాసనసభ బడ్జెట్ సమావేశాలు గురువారంనుంచి ప్రారంభం కానున్నాయి. ఉదయం 11 గంటలకు శాసనసభ, శాసనమండలి ఉభయ సభలను ఉద్దేశించి గవర్నర్ ఇఎస్‌ఎల్ నరసింహన్ ప్రసంగిస్తారు. అనంతరం సభ వాయిదా పడిన తర్వాత బిజినెస్ అడ్వయిజరీ కమిటీ సమావేశం జరుగనుంది. ఇందులో బడ్జెట్ సమావేశాల షెడ్యూల్ ఖరారు చేస్తారు. శాసనసభలో ఈ నెల 14వ తేదీన ఆర్థికశాఖ మంత్రి ఈటెల రాజేందర్ బడ్జెట్ ప్రవేశ పెడుతారు.

హైదరాబాద్: ఎన్నికలు ఏవైనా అధికార తెరాస పార్టీ తిరుగులేని ఆధిపత్య పరంపర కొనసాగిస్తోంది. మొన్నటి వరంగల్ లోక్‌సభ ఉప ఎన్నిక, నిన్నటి గ్రేటర్ హైదరాబాద్ మున్సిపల్ కార్పొరేషన్ నారాయణఖేడ్ అసెంబ్లీ ఉప ఎన్నికైనా, నేటి వరంగల్, ఖమ్మం మున్సిపల్ కార్పొరేషన్లు, అచ్చంపేట నగర పంచాయతీ ఎన్నికల్లోనూ తెరాస పార్టీ విజయదుందుభి మోగించింది. కమ్యూనిస్టులకు కంచుకోట అయిన ఖమ్మం జిల్లాలోనూ తెరాస ప్రభంజనమే సృష్టించింది.

నల్గొండ: నాగార్జునసాగర్‌ పైలాన్‌ కాలనీలో బుధవారం జెన్‌కో ఏడీ వెంకట్ భాస్కర్‌ ఇంట్లో రూ.10 లక్షలు విలువచేసే బంగారం, రూ.60 వేల నగదును దుండగులు పట్టుకుపోయారు. పోలీసులు గాలింపు చర్యలు చేపట్టారు.

హైదరాబాద్: ఓ వివాహితను వేధించినట్లు ఆరోపణలు ఎదుర్కొంటున్న కేసులో నిందితుడైన ఎపి మంత్రి రావెల కిశోర్‌బాబు తనయుడు సుశీల్‌ను బుధవారం బంజారాహిల్స్ పోలీసులు కస్టడీకి తీసుకున్నారు. రెండు రోజుల పాటు కస్టడీలో ఉంచుకుని నిందితుడిని విచారించేందుకు కోర్టు అనుమతి ఇచ్చింది.