భారత జాతీయ సెలక్టర్లు ఇష్టారాజ్యంగా వ్యవహరిస్తారన్నది నిన్నమొన్నటి విమర్శకాదు. ఒక రకంగా మన దేశంలో ఇది అనాదిగా వస్తున్న ఆచారం. చాలా మంది ఆటగాళ్లను వివిధ టూర్లకు తీసుకెళ్లడం, వారితో ఒక్క మ్యాచ్‌ని కూడా ఆడించకుండానే ఉద్వాసన పలకడం భారత సెలక్టర్ల అలవాటు. అసమాన ప్రతిభతో రాణించినప్పటికీ ఎన్నోసార్లు ఉద్వాసనకు గురైన మొహీందర్ అమర్‌నాథ్ కడుపుమండి సెలక్టర్లను ‘జోకర్ల గుంపు’గా అభివర్ణించాడు.

జిడ్డు బ్యాటింగ్‌తో బౌలర్ల సహనానికి పరీక్ష పెట్టే బ్యాట్స్‌మెన్ చాలా మందే కనిపిస్తారు. ఇంగ్లాండ్ మాజీ కెప్టెన్ జెఫ్ బాయ్‌కాట్‌ను ఈ విషయంలో నంబర్‌వన్‌గా పేర్కొంటారు. కానీ న్యూజిలాండ్ మాజీ కెప్టెన్ మార్టిన్ క్రో అతని కంటే ఘనుడు. 1983-84 సీజన్‌లో శ్రీలంకతో కొలంబోలో జరిగిన టెస్టులో అతను చివరి రోజు రెండో సెషన్ మొత్తం బ్యాటింగ్ చేసి, కేవలం నాలుగు పరుగులు చేశాడు.

సమర్థులైనప్పటికీ వివిధ కారణాలతో ఒక దేశాన్ని విడిచి మరో దేశంలో ఆశ్రయం పొందిన శరణార్థులకు కూడా ఇకపై ఒలింపిక్స్‌లో పాల్గొనే అర్హత లభిస్తుంది. ఐక్యరాజ్య సమితి సాధారణ సభలో ఈ విషయాన్ని అంతర్జాతీయ ఒలింపిక్ మండలి (ఐఒసి) చీఫ్ థామస్ బాచ్ ప్రకటించాడు.

అంతర్జాతీయ ఫుట్‌బాల్ సమాఖ్య (ఫిఫా) అవినీతి ఊబిలో కూరుకుపోయి అల్లాడుతున్నది. తీగ లాగితే డొంక కదిలిన రీతిలో ఒక్కొక్కరిగా బయటపడుతున్న అవినీతిపరుల జాబితా రోజురోజుకూ పెరుగుతున్నది. అధ్యక్షుడు సెప్ బ్లాటర్, ఉపాధ్యక్షులు చుంగ్ మాంగ్ జూన్, మైఖేల్ ప్లాటినీ, ప్రధాన కార్యదర్శి జేరోమ్ వాల్కేపై ఇప్పటికే అవినీతి ఆరోపణల నేపథ్యంలో వేటు పడింది.