అమెరికాలోని విశ్వవిద్యాలయాల్లో చదువుకోవడానికి మన విద్యార్థులు దరఖాస్తు చేసుకున్నప్పుడు వారు తొలుత ఐ 20 ఇస్తారు. ఆ తరువాత వీసా కోసం దరఖాస్తు చేసుకుంటే అమెరికా చదువుకు భరించే ఆర్థిక స్థోమత ఉందా? లేదా? అనే అంశాలన్నీ పరిశీలించి వీసా మంజూరు చేస్తారు. వీసా మంజూరు చేసిన తరువాత కూడా ఏవో కుంటి సాకులు చెబుతూ కొందరు విద్యార్థులను అమెరికా విమానాశ్రయం నుంచి తిప్పి పంపడంలో అమెరికా చర్య ఏ మాత్రం సరైనది కాదు.

విదేశీ విద్య పట్ల యువతలో రోజురోజుకీ మక్కువ పెరుగుతోంది. ఇది ఎవరికి ఎంతవరకు ఉపయోగమనేది ఎలా ఉన్నా, ఆశించేవారికి మాత్రం నష్టం జరగకూడదు. విదేశాల్లో విద్యాభ్యాసానికి వెళుతున్న ప్రతి విద్యార్థికి సంబంధించిన పూర్తి వివరాలను తెలుసుకుని, విదేశాల్లో ఆ విద్యాసంస్థ లేదా యూనివర్శిటీ ఉన్నదీ లేనిదీ ఇక్కడే తనిఖీ చేయాలి. అందుకోసం ఒక వ్యవస్థ లేదా ఫోరమ్ ప్రభుత్వ ఆధ్వర్యంలో ఏర్పాటుచేయాలి.

తెలుగు రాష్ట్రాలకు చెందిన విద్యార్థులు చెల్లుబాటు అయ్యే వీసాలను చూపించినా అమెరికా ఇమిగ్రెంట్ అధికారులు ఇటీవల ఆ దేశం నుంచి విద్యార్థులను పంపించివేశారు. అమెరికా అధికారులు ఈ విద్యార్థుల ఆందోళనను అర్థం చేసుకోలేకపోయారు. అమెరికా వ్యవహారశైలిని మన విదేశాంగ మంత్రిత్వ శాఖ తీవ్రంగా ఖండించాల్సిన పరిణామమిది. అలాగే ఈ సంఘటన మన దేశంలో ఉన్నత విద్య వ్యవస్థలో చోటుచేసుకున్న తీరును సూచిస్తోంది.

భారతదేశంలో ఉన్నత విద్య సామాన్య, మధ్య తరగతి ప్రజలకు అందుబాటులో లేకుండా పోయింది. నామమాత్రపు విద్యకే పరిమితమైన వారికి ఉపాధి అవకాశాలు కన్పించడం లేదు. స్వయం ఉపాధికోసం ఎంతగా ప్రయత్నించినా రుణ సదుపాయం లభించని స్థితి. దీంతో ఉన్నత విద్య పేరిట కేవలం ఉపాధికోసమే గత్యంతరం లేని స్థితిలో దళారుల ద్వారా విదేశాలకు వెళ్ళాల్సిన దుస్థితి ఏర్పడింది.