విధేయత, సిద్ధాంతాలతో పనిలేకుండా రాజకీయ అవకాశవాదమే అజెండాగా అధికారంకోసం పార్టీలను ఫిరాయించే నాయకుల సంఖ్య రోజురోజుకూ పెరిగిపోతోంది. అది ఫలానా పార్టీ అంటూ ఏమీ లేదు, అన్ని పార్టీల్లో పరిస్థితి ఒకేలా ఉంది. తాజాగా తెలుగుదేశం పార్టీ ఎమ్మెల్యేలు ముగ్గురు తెలంగాణ రాష్ట్ర సమితిలో చేరడంతో మరోమారు పార్టీ ఫిరాయింపుల అంశం చర్చకు వచ్చింది.

ఒక పార్టీ గుర్తుపై పోటీ చేసి ఎమ్మెల్యే లేదా ఎంపీగా ఎన్నికైన వ్యక్తి మరో పార్టీలో చేరాలనుకుంటే, తొలుత తన సభ్యత్వానికి, పార్టీకి రాజీనామా చేసి చేరితే ఎవరికీ అభ్యంతరం ఉండదు. అలా కాకుండా ఎన్నికైన పార్టీకి ఉన్నఫలంగా గుడ్‌బై చెప్పి తనకు నచ్చిన పార్టీలో చేరడం పూర్తిగా అనైతికం. ఇటువంటి ఫిరాయింపులను అరికట్టేందుకు పార్టీ ఫిరాయింపుల నిరోధక చట్టాన్ని మరింత పటిష్టపరచాల్సిన అవసరం ఉంది.

తెలంగాణ కొత్త రాష్ట్రం. రాష్ట్రం ఆవిర్భవించి టిఆర్‌ఎస్ అధికారంలోకి రాగానే ముఖ్యమంత్రి కల్వకుంట్ల చంద్రశేఖర్‌రావు అన్ని పార్టీలకు విజ్ఞప్తి చేశారు. మిగిలిన రాష్ట్రాలు వేరు, కొత్తగా ఏర్పడిన మన రాష్ట్రం వేరు. రాష్ట్భ్రావృద్ధికి అందరం కలిసి పనిచేద్దాం, సూచనలు, సలహాలు ఇవ్వండి అని కోరారు. ఆరునెలల్లోనే విద్యుత్ సమస్యను ముఖ్యమంత్రి పరిష్కరించి చూపించారు.

ప్రభుత్వం పార్టీ ఫిరాయింపును చట్టం చేసింది.. కానీ అమలు జరగడం లేదు. ఎంతో విశ్వాసంతో ప్రజలు ఓటు వేస్తారు. వారిని కాదని ఏవో ప్రలోభానికి లోనై పార్టీలు మార్చడం ప్రజలందరినీ మోసం చేసినట్టే. ప్రస్తుతం ఉన్న రాజకీయ పార్టీల్లో పార్టీ మారని నైతిక విలువ కేవలం లోక్‌సత్తా పార్టీకే ఉంది. కాంగ్రెస్‌కు లీడర్ లేడు.. టిడిపికి క్యాడర్ లేదు.. దీనికి కారణం టిఆర్‌ఎస్సే.