కేంద్ర ప్రభుత్వం జాతీయ స్థాయిలో ప్రతిపాదించిన స్మార్ట్ సిటీల తొలి జాబితాలో ఆంధ్రప్రదేశ్‌లోని విశాఖపట్నం, కాకినాడ పట్టణాలున్నాయ. 2015-16 ఆర్థిక సంవత్సరం నుండి ఈ పథకం కింద నిధులు లభిస్తాయి. దేశం మొత్తంలో 98 స్మార్ట్ సిటీలుగా గుర్తించారు. ఈ మొత్తంలో తొలి జాబితాలో ఆర్థిక చేయూత ఇచ్చేందుకు 20 నగరాలను ఎంపిక చేయగా ఎపిలోని రెండు నగరాలు ఇందుకు ఎంపికయ్యాయి. తర్వాతి దశలో తిరుపతిని కూడా ఎంపిక చేస్తారు.

స్మార్టు సిటీల పథకం సవ్యంగా అమలుజరిగితే నగరాల స్వరూపమే మారిపోతుంది. ఇది కేవలం ప్రభుత్వానికి సంబంధించి మాత్రమే కాదు, ప్రజల భాగస్వామ్యంతో ప్రజల సహకారంతో, ప్రజల ప్రమేయంతో నడిచే పథకం. ప్రజలు ముందుకు వచ్చి తమ నగరాలు అందమైనవిగా, కాలుష్యరహితమైనవిగా, అత్యాధునిక సాంకేతిక పరిజ్ఞానంతో ముందుకు సాగేవిగా ఉండాలని కోరుకోవాలి, అందుకు ప్రజలు అంతా తోడ్పడాలి.

దేశంలో ఎంపిక చేసిన నగరాలను స్మార్ట్ సిటీలుగా అభివృద్ధి చేయాలని కేంద్రప్రభుత్వం తలపెట్టడం మంచి పరిణామమే. కానీ అభివృద్ధి చెందిన నగరాలనే మరింత అభివృద్ధి చేస్తామంటే ఎలా? అసలు అభివృద్ధికి నోచుకోని నగరాల సంగతేంటి. వీటి గురించి కూడా ఆలోచన చేయాల్సిన అవసరం ఉంది. కేంద్ర ప్రభుత్వం అన్ని రాష్ట్రాలను సమానంగా చూడాల్సిన అవసరం ఉంది. పక్షపాతం అసలు పనికిరాదు.

కేంద్ర ప్రభుత్వం చెబుతున్న స్మార్ట్ సిటీల నిర్మాణం అనేది ఒక భ్రమ. అది రంగుల ప్రపంచాన్ని చూపించడమే అవుతుంది. అసలు వౌలిక సదుపాయాలైన తాగునీరు, రోడ్లు, డ్రైనేజీలు, కమ్యూనికేషన్, శానిటేషన్, వీధిదీపాలు వంటివి సక్రమంగా లేని పట్టణాలు, ద్వితీయ స్థాయి నగరాలు చాలా ఉన్నాయి. వీటిని అభివృద్ధి చేయడం ద్వారా ప్రజల అవసరాలను తీర్చేందుకు అవకాశం ఉంటుంది.