ఓడిపోవటం, గెల్వటం సంగతేముంది
యుద్ధరంగమే లేనపుడు
జనాన్ని శత్రువు తరుముతున్న మాట నిజం
పొలాలు ఇల్లు విడిచి పారిపోతున్న మాట నిజం
కాళ్లు నిల్చిన స్థలంలో కూడా
కాంతిలేని జీవితం జనానిది
కష్టం మొలకెత్తిన పొలాలలో కూడా
శాంతి లేని జీవనం జనానిది
ఎవరు నిలిపారో
జనం గుండెల మీద అమావాస్య నిలిపారు
ఎవరు శత్రువు
రాత్రి దీపాన్ని ఆర్పేస్తున్నారు

కూల్చేవానికి నిర్మించటమూ తెల్సు
నిర్మాణానికి రాళ్లెత్తుతున్నా
ఆధిపత్యాన్ని కూల్చే
అస్తిత్వానికి ప్రశ్నలు ప్రాణాలు

ఉసిళ్లపుట్టల్లా ఎగిసా
తేనేటీగల్లా తరిమా
దోసిలిపట్టిన నీళ్లల్లో ముఖమే కాదు
నా గత గాయాలు, భవిష్య దర్శనాలు

ప్రతి అడుగు గెలుపు కాదు
ఒక అడుగు గెలిచింది
రెండో గెలుపునకు అడుగులు పడాలి
నా నేల విముక్తికి రహదారి

పరిశ్రమల విల్లుల నుండి వదిలిన
కాలుష్య శరములు అదుపు చేయలేక
వాయు దేవుడు అలసిపోయిన నాడు
జీవుల శ్వాసలు చావుకేకలు వేస్తాయి

రసాయనాలతో ఆహారాన్ని కల్తీ చేసి
అమ్మి సొమ్ము చేసుకొని మురిసిన నాడు
రోగాలు చుట్టుముట్టి బక్కచిక్కిన మనుషుల
మరణ మృదంగం నలుదిక్కులా వినిపిస్తుంద

బ్రతకాలంటె శ్వాసించాలి
శ్వాసించాలంటె కావాలి గాలి
గాలి బ్రతుకులు మనవి
గాలికి లేదు స్ర్తి పురుష భేదం
గాలి లేకుంటె లేదు జీవం

పుట్టేటప్పుడు కావాలి గాలి
పోయెటప్పుడు పోయేది గాలి
ప్రాణం కలిసేది గాలిలో
దేహం కలిసే మట్టిలో

గాలి మన ప్రాణం
గాలి మన గానం
గాలి మన నాదం
గాలి విలువ తెలుసుకో
గాలి దేవుడని తెలుసుకో.