శ్రీరామరామ
Published Saturday, 24 March 2018రాముడు
సీతాసమేత కారుణ్యధాముడు
కార్యశూరుడు మానవ దేవుడు
పత్నీబద్ధుడు
ధర్మమనే విల్లును పట్టి
న్యాయాంబులను ఎక్కుపెట్టి
ధరలో నీతిని నిలిపిన
రామాయణ పురుషుడు
శబరి ప్రేమను ఆస్వాదించిన రేడు
అహల్యను శాపవిముక్తను చేసినవాడు
కైకేరుూ మానస పుత్రుడు
పదవీ త్యాగంలో పవిత్రుడు
తండ్రి మాట జవదాటడు
గుహుని నావలో అద్దరి చేరిన మారాజు
భద్రాచల రామదాస పోషకుడు
త్యాగయ్యకు వాగ్గేయదాత
సంగీత సాహిత్య విధాత
పోతన్నకు వరములు పలికించిన రామభద్రుడు
హనుమ మోసిన సీతారాముడు
ముల్లోకాలు చేతిలో వుంచుకున్న జగద్రక్షకుడు
రామ శబ్దం
పలుకలేని బోయ వాల్మీకిని
శ్రీరామచరిత రచింపజేసిన నువ్వు
మాకు సత్ప్రవర్తనాభరిత సౌమ్య నాగరికతను
భిక్షగా ఇవ్వలేవా
భవసాగరం దాటాక ఈ ఆత్మలేవౌతాయో
రామా శ్రీరామా
ఈ జగతిని ఆనంద రామానంద
ఆరామ మందిరం చేయవా
ఇహంలో నా తోటివారికి
సాయపడే తారకమంత్రం నీ నామమే కదా-
శ్రీరామ రామ
*