ప్రపంచంలో ఎక్కడైనా వ్యక్తుల పేరుతోనో, సంస్థల పేరుతోనో ఉత్తరాలు రాస్తారు. కానీ ఉత్తర జర్మనీలో యూటిన్ నగరానికి సమీపంలోని డొడావెర్ అడవిలో 500 సంవత్సరాల నాటి ‘ఓక్’ చెట్టుకు దేశవిదేశాల నుంచి ఎందరో పెళ్లీడుకొచ్చిన అమ్మాయిలు, అబ్బాయిలు ఉత్తరాలు రాస్తుంటారు. ప్రపంచంలోనే పోస్టల్ చిరునామా కలిగిన ఏకైక చెట్టు ఇదే! దీనికోసం ప్రత్యేకంగా ఓ పోస్టల్ కోడ్, పోస్టుబాక్సు (చెట్టుతొర్ర)తో పాటు, దీనికో పోస్టుమ్యాన్ కూడా ఉన్నాడు. చెట్టుకు మూడు మీటర్ల ఎత్తులో ఉన్న ఆ పోస్టుబాక్సు (తొర్ర) దగ్గరకు సులువుగా వెళ్లేందుకు ఓ నిచ్చెన కూడా ఉంటుంది.
చెట్టుకు ఉన్న తొర్రనే పోస్టుబాక్సుగా పిలవబడుతుంది ఇక్కడ. అయితే ఇదే ప్రపంచంలోని అత్యంత రొమాంటిక్ పోస్టుబాక్సుగా పేరు పొందింది. ఈ ఓక్ చెట్టుకు ఉత్తరం రాస్తే తొందరగా పెళ్లవుతుందని చాలామంది నమ్మకం. తమకు నచ్చిన లక్షణాలు, అర్హతలు ఉన్న భాగస్వామి కావాలని వివరిస్తూ.. ఈ చెట్టుకు ఉత్తరం రాసి పంపుతారు. వీటన్నింటినీ ఓ పోస్ట్‌మ్యాన్ తీసుకెళ్లి ఆ చెట్టు తొర్రలో ఉంచుతాడు. ఎవరైనా వచ్చి వాటిని తీసుకుని చదివి, ఆ లక్షణాలు వారిలో ఉన్నట్లయితే.. ఆ ఉత్తరం రాసినవారికి ప్రత్యుత్తరం పంపొచ్చు. అలా ఇద్దరి మధ్య ఏర్పడే పరిచయం వివాహానికి దారితీస్తుంది. ఇలా ఈ చెట్టు ఇప్పటి వరకు వంద జంటలకు పైగా కలిపిందట. ఈ చెట్టు చిరునామాకు దేశవిదేశాల నుంచి ఏటా దాదాపు వెయ్యికి పైగా ఉత్తరాలు వస్తాయని జర్మనీ తపాలా సేవల సంస్థ ‘డచ్ పోస్ట్’ అధికార ప్రతినిధి మార్టిన్ గ్రండ్లర్ చెప్పారు. ముఖ్యంగా వేసవిలో ఈ చెట్టుకు ఎక్కువ ఉత్తరాలు వస్తాయిట.
128 సంవత్సరాల క్రితం ఓ జంట ప్రేమకథే ఈ నమ్మకం ఏర్పడటానికి కారణమని చెబుతాడు మార్టిన్. 1890లో మిన్నా అనే స్థానిక యువతి అదే ఊరికి చెందిన విల్‌హెల్మ్ అనే యువకుడిని ప్రేమించింది. అయితే అతన్ని కలవకూడదని, చూడొద్దని అతని తండ్రి హెచ్చరించాడు. దాంతో ఆ ప్రేమికులిద్దరూ రహస్యంగా లేఖల ద్వారా సంభాషించుకునేవారు. వీరిద్దరూ నేరుగా కలుసుకోకుండా ఆ చెట్టు తొర్ర ద్వారా సమాచారాన్ని చేరవేసుకునేవారు. అలా ఓ సంవత్సరం గడిచాక ఆ యువతి తండ్రి వారి పెళ్లికి అంగీకరించాడు. ఆ ప్రేమకథ జర్మనీ అంతా తెలియడంతో.. ఆ చెట్టుకి ప్రేమలేఖలు రావడం మొదలైంది. రోజురోజుకీ ఉత్తరాల సంఖ్య పెరగడంతో డచ్ పోస్ట్ సంస్థ ఆ చెట్టుకు ప్రత్యేకంగా పోస్టల్ కోడ్, పోస్టుమ్యాన్‌ను ఏర్పాటుచేసింది.
*