నిశ్చిత స్థితిలో...
Published Saturday, 2 February 2019తిరిగిరాని వొక సాయంత్రం
ఉండగట్టి విసిరేసినప్పుడు
రెక్కలు తెగి పడిపోతాయి
వొక దిగులు మేఘమై అల్లినప్పుడు
వొంటరితనం నెమలై
పురివిప్పి ఆడుతుంది
నన్ను నేను మోసుకుంటూ
తెలియనితనంతో సాగుతున్నా
జ్ఞాననేత్రం తెరిచే వేళ
నా ఉనికెక్కడో
అనంతంలో లెక్కతేలని మిగులై
కాలంలో నిలిచిపోతాను
అప్పటివరకూ కట్టె ప్రయాణం
కొనసాగించాల్సిందే....