తెలుగోడి గోల
Published Saturday, 27 April 2019ఏమిటా గోల
ఏముందీ తెలుగోడి గోల
తెలుగులో మాట్లాడితే చిన్నతనం
ఇంగ్లీషులో ఇకిలిస్తే పెద్దతనం
మనకెందుకులే అనుకోవడం సోమరితనం
నిన్నూ నీ భాషను ఉద్ధరించుకోవడం మగతనం
ఈనాడు ఎవడిక్కావాలి ఇతిహాసం
సినిమాలూ, టీవీలతోనే మందహాసం
చాదస్తాన్నీ ఛందస్సునూ వదలి
వచనాల్లో వర్ణించడం, వల్లించడం
అందరికీ సులభంగా జీర్ణించడం
ఇదే అందరినీ ఆకర్షించడం
ఆనందంగా ఆహ్వానించతగ్గ విషయమే!
తేలిక తేలిక అంటూ తెలుగు పీలికలను
ఇంగ్లీషు పీచులతో నాలుకపై ఆడించడం
అలవాటై పోయి, పాండిత్యాన్ని పరిహసించడం
అదేదో పాచి పదార్థమై పోయినట్లుగా
అసలు పట్టించుకోక పోవడం దారుణం
ఈ వింత ధోరణిలో ఈ ధరణిలో
తిరిగి తెలుగు భాషా వైభవము సంభవమా!
ప్రాచీన భాషా హోదాలతో
ప్రపంచ తెలుగు మహాసభలతో
సంతృప్తి చెంది సర్దుకుపోదామా!
ఏమిటో తెలుగోడి గోల
ఎవరికీ అంతుబట్టని లీల