దాగుడుమూతలు
Published Saturday, 22 June 2019ఎక్కడ చూసినా భయంకరమే
ఏ మాట విన్నా గుండెలో బాణమే
ఏ సహచర్యమైనా తప్పటడుగే
ఏ బంధమైనా తెగిపోయే సూత్రమే...
సప్త సముద్రాల ఆనంద ఘోష వినాలనీ
సప్త ద్వీపాలలో విహరించాలనీ
సుప్తచేతనావస్థలో జీవించాలనీ
సప్తవర్ణాల కాంతులను ధరించాలనీ
ఎన్ని జన్మలుగా కోరిక
తీవలు సాగుతున్నదో
తెలియదు కదా ఎక్కడ ఆడుతున్నదో
కనపడకుండా దాగుతున్నదో...
పాపం నుంచీ కోపం నుంచీ..
తాపం నుంచీ పరితాపం నుంచీ
స్తబ్దత నుంచీ నిశ్శబ్దత నుంచీ
దూరంగా ఉండాలనీ ఆలోచన పండాలనీ
మోసాల నుంచీ మోహాల నుంచీ
అబద్ధాల నుంచీ అన్యాయాల నుంచీ
పంచభూతాలను వెంట తీసుకుని
వడివడిగా అడవిలోకి ఉరకాలనీ
ప్రహరీలు చుట్టూ నిర్మించుకుంటే
అందకుండా కందకాలు త్రవ్వితే
ఎక్కలేకుండా తైలాలు పూస్తే
మనశ్శాంతి జారిపోతుంది.
నువ్వెక్కడ ఉన్నా మనసు నీలోనే ఉంది
నీ మనసులోనే ఆలోచన ఉంది
ఆలోచనలోనే బాధ సమస్తం ఉంది
అనూహ్యం - అనివార్యం అని వినిపిస్తోంది.
అయినా ఏదో ఒక సందు నుంచి జీవితం
ఒక మూల నుంచి ప్రపంచం
గుహలోకి ప్రవేశిస్తూనే ఉన్నాయి
నిగ్రహాన్ని పరీక్షిస్తూనే ఉన్నాయి.