బుద్ధిః కర్మానుసారిణి
Published Saturday, 19 October 2019ఎప్పుడు చూసినా అలజడి
ఏమిటో తెలియదు జనం నాడి
ఎందుకో వాళ్లకంత వేడి
ఏమన్నా అంటే అర్థంలేని దాడి
తడిలో ఏముందంటూ మడిని
బోడి బొమ్మ దేవుడేమిటంటూ గుడిని
పంతులా గింతులా అంటూ బడిని
గేలిచేస్తూ గోలచేస్తూ గందరగోళం
తల్లి, తండ్రి, గురువు, దైవంకన్నా
పదవి, పెదవి, పైకం, మైకమే మిన్న
అన్న ధ్యాసలో కాలరెత్తుకొని
అనుక్షణం కాలక్షేపం
ఉన్నతాశయాలు కలగాలంటే
ఉన్నత వ్యక్తుల జీవితాల్ని చదవాలి
ఏం చదువుతారు? ఏం తెలుసుకుంటారు?
ఏ పుస్తకాన్ని చూసినా పస్తులున్న ముఖాలవుతాయి
టీవీలన్నా సినిమాలన్నా, పాప్ గీతాలన్నా
గాజులోళ్లమంటూ గెంతులేస్తారు