నవ మాసాల గండం నుంచి
గట్టెక్కెందో లేదో
నిమిషం నిమిషం
మృత్యుద్వారం ముందు
ఎదురుచూపులు
ఆడపిల్లగా పుట్టడమే
శాపమైన దేశంలో దినామూ
వొక సంఘర్షణే
ఎదిగే సీతాకోక చిలుకని
కబళించడానికి ఎన్ని చేతులో
లాఘవంగా తప్పించుకోని
ఎదిగిన క్రమం కష్టమే
యవ్వనాన్ని దాచలేని
శరీరంతో రాక్షస ప్రేమల నుంచి
రక్షించుకోవడం
కత్తిమీద సామే కదూ
చదువుల నుంచి క్రీడలు
వ్యవసాయం నుంచి అంతరిక్షం దాకా
బతుకు కోసం పోరాటం
తన బతుకుకి విలువ ఇవ్వని
నిర్దయ ప్రపంచంతో
అస్తిత్వం కోసం
తరతరాలుగా కోట్లాడుతూనే ఉంది
పితృస్వామ్య పంజరం
విడుదల కోసం
వొకటే యుద్ధం
తానుగా కోరుకొని
యుద్ధమిది
లింగభేదాలలో ఓడిపోతూ
తనని తాను గెలవడానికి
ప్రతీ క్షణం తపన
మూఢనమ్మకాల చీకటి దారులని
చీల్చుతూ తానొక వెలుగు కాగడా
ఆడవాళ్లు ఏమి చేయగలరన్న
అపవాదుకి కాలం చెల్లింది
ఇప్పుడు ఆమె
తన అస్తిత్వాన్ని సగర్వంగా లోకం
ముందు నిలబెట్టుకుంది
ఇక అంతా మహిళావరణమే!