చికాగో నదిలో దాదాపు 60వేల రబ్బర్ బాతు బొమ్మలను ఈమధ్య వదిలారు. వాటిలో ఏ బొమ్మయితే ముందుగా నిర్ణయించిన ఫినిషింగ్ లైన్‌ను తాకుతుందో ఆ బొమ్మ యజమాని ప్రైజ్ మనీ గెలుచుకుంటారు. ఇల్లినాయిస్ ఒలింపిక్స్ కోసం విరాళాల సేకరించేందుకు ఏటా ఈ విండ్‌సిటీ రబ్బర్ డక్ డెర్బీ పేరుతో ఓ పోటీ నిర్వహిస్తారు. ఒక్కో బొమ్మ 5 డాలర్లకు విక్రయిస్తారు. వాటిని కొన్నవారి పేరుతో అవి ఉంటాయి.

ఇంగ్లండ్‌లోని బ్రిస్టల్‌లో ఇప్పుడు చిత్రకళావైభవం కళాభిమానులను అలరిస్తోంది. యూరోపియన్ యూనియన్‌లోనే అతి పెద్దదైన ‘స్ట్రీట్ ఆర్ట్ ఫెస్టివల్’ ఇప్పుడు అక్కడ నిర్వహిస్తున్నారు. యూరప్‌లోని వివిధ దేశాల నుంచి పెద్ద సంఖ్యలో కళాకారులు వచ్చి బ్రిస్టల్‌లోని పలు భవంతుల గోడలు, వీధులు, సైన్‌బోర్డులు, ఎక్కడ అవకాశం ఉంటే అక్కడ బొమ్మలు వేస్తున్నారు.

కెనడా 150వ వార్షికోత్సవం సందర్భంగా ఒట్టావాలో ఓ అద్భుత ప్రదర్శన ప్రజలను అలరించింది. చైనా పురాణాల్లో చెప్పుకునే జెయింట్ డ్రాగన్ (సగం డ్రాగన్, సగం గుర్రంలా), జెయింట్ స్పైడర్‌లను పోలినట్లుండే మెషిన్‌ల మధ్య ఉత్కంఠ రేపే పోరాట సన్నివేశాలు ఒట్టావాలో నడిరోడ్డుపై నాలుగు రోజుల పాటు ప్రజలను అలరించాయి. ఫ్రాన్స్ చెందిన లా మెషిన్స్ అనే సంస్థ, కెనడా ప్రభుత్వం సంయుక్తంగా ఈ పోటీని నిర్వహించాయి.

చైనాలోని ‘దతాంగ్’లో 1500 ఎకరాల్లో ఏర్పాటు చేసిన ఈ సోలార్ పవర్ ప్లాంట్‌లోని సోలార్ ప్లేట్స్‌ను ఇలా పాండా రూపం వచ్చేలా ఏర్పాటు చేశారు. యునైటెడ్ నేషన్స్ డెవలప్‌మెంట్ ప్రొగ్రామ్ కింద చైనాకు చెందిన పాండా గ్రీన్ ఎనర్జీ సంస్థ ఈ మెగా ప్రాజెక్టును చేపట్టింది. వేలాది సోలాన్ ప్యానల్స్‌ను ఇలా పాండా రూపం వచ్చేలా పెట్టి విద్యుత్ ఉత్పత్తి చేస్తున్నారు.