శ్రీమతి రాధిక కోడిమాల ప్రఖ్యాత కూచిపూడి నర్తకి. సంప్రదాయ కూచిపూడి నృత్యంతోపాటు కథక్, జానపదం, లలిత సంగీతంలో నిష్ణాతురాలు. శ్రీమతి రాధిక బహుముఖ ప్రజ్ఞాశాలి. తల్లిగా, గృహిణిగా, వ్యక్తిగతంగా ఎన్నో బాధ్యతలు నిర్వహిస్తూ, కొన్ని దశాబ్దాలుగా కళాసేవ చేస్తున్నారు. ‘కురుగంటి కళాక్షేత్రం’ స్థాపించి నృత్యం నేర్పుతూ ఉత్తమ కళాకారులను తీర్చిదిద్దుతున్నారు. దేశ విదేశాలలో ఎన్నో ప్రదర్శనలిచ్చారు.

డా.పసుమర్తి శేషుబాబుగారు ప్రఖ్యాత కూచిపూడి నర్తకులు, గురువు, సంగీత విద్వాంసులు. దేశ విదేశాలలో 2000 పైగా ప్రదర్శనలిచ్చి, కూచిపూడి కీర్తిపతాక నెగురవేశారు. ఎన్నో ముఖ్యమైన సంగీత, నృత్య పరీక్షలకు ఎగ్జామినర్‌గా వెళ్తూంటారు. కూచిపూడి నృత్య భారతి 1985లో హైదరాబాద్‌లో స్థాపించి, ఎంతోమంది కళాకారులను తీర్చిదిద్దుతున్నారు. సిసిఆర్‌టి ప్యానల్ జడ్జిగా ఎన్నో సంవత్సరాలుగా ఉన్నారు.

వేముగంటి శ్రీ్ధరాచార్య ప్రఖ్యాత మృదంగ విద్వాంసులు. ఘటం, కంజీర, మోర్సింగ్, కోలు, చండి, తబలా మొదలగు ఎన్నో వాయిద్యాలతోపాటు మృదంగం కూడా వాయిస్తారు. 12వేలకు పైగా దేశ విదేశాల్లో ప్రదర్శనలిచ్చారు. ప్రఖ్యాత డాన్స్ ఫెస్టివల్స్‌లో ఎంతో మంది ప్రఖ్యాత నర్తకుల ప్రదర్శనల్లో పాల్గొన్నారు. ఫుల్‌టైమ్ సంగీత విద్వాంసునిగా అవక ముందు హైదరాబాద్ పాతబస్తీలో గుడిలో అర్చకునిగా ఉండేవారు. కళ కూడా పూజే!

కృషి, పట్టుదల, నిరంతర పరిశ్రమ, భవిష్యత్తును అంచనా వేయగలిగే నేర్పు, కష్టనష్టాలను సమాన దృష్టితో చూడగలిగే మనోస్థైర్యం కలవారు జీవితంలో తప్పకుండా ఉన్నత స్థాయికి చేరుతారు. తాము అభివృద్ధిలోకి రావడమే కాదు తమ తోటివారి అభివృద్ధికి కూడా బాటలు నిర్మిస్తూ ముందుకు సాగుతారు.