పశ్చిమ గోదావరి జిల్లా తణుకుకు చెందిన తోట సుబ్బారావు తొలుత బస్ సర్వీసులు నడిపేవారు. తరువాత చిత్రరంగంలోకి ప్రవేశించి నిర్మాతగా ‘దొంగను పట్టిన దొంగ’ డబ్బింగ్ చిత్రం తీశారు. శ్రీదేవి కంబైన్స్ పతాకంపై 1966లో ‘పరమానందయ్య శిష్యులకథ’, ‘67లో భువనసుందరి కథ, ‘68లో చుట్టిరికాలు సినిమాలు తీశారు. ఆక్రమంలో 1969లో వీరు నిర్మించిన చిత్రమే -భలే అబ్బాయిలు. ఈ చిత్రానికి పేకేటి శివరామ్ దర్శకులు.

1931లో ఉత్తరప్రదేశ్ ఆలీఘర్ ప్రాంతంలోని ఆట్రాలి గ్రామంలో జన్మించారు రవికాంత్ నగాయిచ్. హీరో యన్‌టి రామారావు నిర్మించిన ‘సీతారామకల్యాణం’ చిత్రంతో సినిమాటోగ్రాఫర్‌గా చిత్రరంగంలోకి ప్రవేశించారు. ఆ తరువాత గులేబకావళి కథ, శ్రీకృష్ణార్జునయుద్ధం, శ్రీకృష్ణ పాండవీయం, వీరాభిమన్యు వంటి పలు చిత్రాలకు ట్రిక్ ఫొటోగ్రాఫర్‌గా వినుతికెక్కారు. హిందీ చిత్రసీమలోనూ పలు చిత్రాలకు పని చేసి పేరుపొందారు.

ప్రముఖ నిర్మాత హెచ్‌ఎం రెడ్డి తీసిన ‘నిర్దోషి’ చిత్రం ద్వారా పరిశ్రమకు పరిచయమై, అదే నిర్మాత తీసిన జానపద చిత్రం ‘ప్రతిజ్ఞ’లో హీరోగా నటించారు తాడేపల్లి లక్ష్మీకాంతారావు (టియల్ కాంతారావు). అలా పలు జానపద, సాంఘిక, చారిత్రక, పౌరాణిక చిత్రాల్లో కథానాయకుడిగా విభిన్న పాత్రలతో మెప్పించి -జానపద హీరోగా, కత్తివీరునిగా, నారద పాత్ర పోషణలో ప్రత్యేకత ప్రదర్శించిన విలక్షణ నటుడు ఆయన.

1907 జూలైలో జన్మించారు ఏవి మొయ్యప్పన్. 1938లో ‘అల్లి అర్జున్’తో కలిసి ప్రయత్నాలు మొదలుపెట్టి 1940లో ప్రగతి స్టూడియోస్ ఆరంభించారు. 1945 నవంబర్ 14న శాంధోంలో ఏవీయం స్టూడియో ప్రారంభించి తరువాత వడపళనికి మార్చారు. 1950లో ‘జీవితం’ చిత్రం మొదలు తెలుగు, తమిళ, కన్నడ, హిందీ భాషల్లో వందకిపైగా సినిమాలు నిర్మించిన సంస్థ ఏవీయం. విశిష్ట స్థానం కలిగిన ఈ సంస్థ పలు విజయవంతమైన చిత్రాలను రూపొందించింది.