విద్యార్థుల ర్యాలీని అడ్డుకున్న పోలీసులు

హైదరాబాద్: తెలంగాణ ఆవిర్భావ దినోత్సవం సందర్భంగా అమరవీరులకు నివాళి అర్పించేందుకు ఓయు విద్యార్థులు తలపెట్టిన బైక్ ర్యాలీని బుధవారం పోలీసులు అడ్డుకున్నారు. నవ తెలంగాణ విద్యార్థి సంఘం నేతృత్వంలో ఓయు ఆర్ట్సు కాలేజీ నుంచి గన్‌పార్కు వరకూ ర్యాలీ జరపాలని విద్యార్థులు భావించారు. ర్యాలీ ఎన్‌సిసి గేటు వద్దకు రాగానే పోలీసులు అడ్డుకున్నారు. దీంతో విద్యార్థులకు, పోలీసులకు మధ్య ఘర్షణ వాతావరణం ఏర్పడింది. నిబంధనలను ఉల్లంఘించారని కొంతమంది విద్యార్థులను పోలీసులు అరెస్టు చేశారు.