లండన్, జూన్ 6: ప్రపంచ శాంతి సూచికల్లో భారత్ 137వ స్థానంలో నిలిచింది. సిడ్నీకి చెందిన ఇనిస్టిట్యూట్ ఆఫ్ ఎకనామిక్స్ అండ్ పీస్ అనే సంస్థ ప్రపంచ శాంతి సూచికలను ఖరారు చేసింది. ఇందులో 163 దేశాలు పాల్గొన్నాయి. నిఘా, శాంతి భద్రతల పరిరక్షణ విభాగాన్ని పటిష్టం చేయడం, చట్టాలను అమలు చేయడం వల్ల హింసాత్మక ఘటనలు భారత్‌లో గణనీయంగా తగ్గాయని ఈ సంస్థ పేర్కొంది.

లక్నో, జూన్ 6: యూపీలోని కొన్ని దేవాలయాలు, స్టేషన్లను పేల్చివేస్తామని లష్కర్ తొయిబా పేరిట బెదిరింపులు వచ్చిన నేపథ్యంలో ఆ రాష్ట్రంలో హైఅలర్ట్ ప్రకటించారు. మధురలోని కృష్ణజన్మభూమి దేవాలయం, వారణాసిలోని కాశీవిశ్వనాథుని ఆలయాన్ని పేల్చివేస్తామని, అలాగే సహర్నపూర్, హాపూర్ రైల్వేస్టేషన్‌లను పేల్చివేస్తామని లష్కర్- ఎ-తొయిబా పేరిట ఫిరోజ్‌పూర్‌లోని రైల్వే డిఆర్‌ఎం గత నెల 29న ఒక లేఖ అందింది.

శ్రీనగర్, జూన్ 4: కాశ్మీర్‌లోని పుల్వామా, షోపియా జిల్లాల్లో సోమవారం మిలిటెంట్ల రెండు గ్రెనేడ్ దాడుల్లో 8మంది భద్రతా సిబ్బంది సహా 23మంది గాయపడ్డారు. ఇటీవలి కాలంలో ఈ రకమైన దాడులు తీవ్రమైన నేపథ్యంలో తాజా సంఘటన ఆందోళన రేకెత్తిస్తోంది. మొదటి దాడి షోపియా జిల్లాలో చోటుచేసుకుంది. ఈ ఘటనలో 12మంది పౌరులు, 4 పోలీసులు గాయపడ్డారు.

గ్వాటెమాలా సిటీ, జూన్ 4: ఆదివారం ఫ్యూగో అగ్నిపర్వతం పేలిన సంఘటనలో కనీసం 25 మంది ప్రజలు మరణించారు. పేలిన అగ్నిపర్వతం నుంచి పెద్దఎత్తున వెలువడుతున్న బూడిద, రాళ్ల కారణంగా, గ్వాటెమాలా విమానాశ్రయాన్ని మూసివేశారు. తగిన వెలుతురు లేకపోవడం, ప్రమాదకర పరిస్థితుల నేపథ్యంలో మరణించినవారి ఆచూకీ కోసం చేస్తున్న యత్నాలను తాత్కాలికంగా నిలిపివేశారు.