నచ్చిన పాత్రలే చేస్తా

శ్రీహర్ష కొనుగంటి దర్శకత్వంలో బెక్కెం వేణుగోపాల్, రియాల్ నిర్మించిన హుషారు మంచి టాక్ తెచ్చుకోవడంతో కెరీర్‌పై మంచి హుషారుతో ఉంది హీరోయిన్ ప్రియావడ్లమాని. ఆ ఆనందంలో మీడియాకు చెప్పిన విశేషాలు.
‘హుషారు’ సక్సెస్‌ను ఎలా ఎంజాయ్ చేయాలో కూడా తెలీడంలేదు. సినిమాను ఇంకెంత ప్రమోట్ చేయొచ్చు అనేదే ఆలోచిస్తున్నాం. గత రెండేళ్లుగా ఈ సినిమా కోసం వెయిట్ చేస్తూ టెన్షన్ పడేదాన్ని. ఇప్పుడు ఆ భయం లేదు. భవిష్యత్తులో దర్శకత్వం చేస్తానా? లేదా? అన్నది చెప్పలేను. ఎందుకంటే మనసంతా యాక్టింగ్‌మీదే ఉంది. ఫ్యూచర్ గురించి ఇంకా ఏమీ ఆలోచించలేదు. నేను క్లాసికల్ డాన్స్ 12 ఏళ్లు నేర్చుకున్నా. కెరీర్ మొదట్లోనే క్యూట్ ప్రేమకథలో నటించడం, పూర్తిగా యూత్ నేపథ్యంలో సినిమా చేయడం హ్యాపీగా ఉంది. ఇక శుభలేఖలు సినిమా పూర్తిస్థాయిగా ఫ్యామిలీ సినిమా అయితే అందులో సిగరెట్ తాగే సన్నివేశాల గురించి చాలామంది అడుగుతున్నారు. నిజానికి నేను సిగరెట్ తాగింది కేవలం పాత్ర మాత్రమే. నేను పక్కా తెలుగమ్మాయినే. టెన్త్, ఇంటర్ హైదరాబాద్‌లో చదివాను. బిటెక్ బెంగుళూరులో చేశా. మా నాన్న బిజినెస్‌మెన్. మాది మధ్యతరగతి ఫ్యామిలీ. నాకు దర్శకురాలు అవ్వాలన్న ఆలోచనతో పరిశ్రమకు వచ్చాను. వంశీ పైడిపల్లి దగ్గర అసిస్టెంట్ డైరెక్టర్‌గా చేరాను. మహర్షి సినిమాకు పనిచేశాను. అదే సమయంలో ‘హుషారు’ ఛాన్స్ వచ్చింది. దర్శకుడు చెప్పిన కథ నచ్చడంతో ఓకె చెప్పాను. తరువాత వెంటనే శుభలేఖలు, మరో సినిమా చేశా. ఈ సినిమాలో లిప్‌లాక్ కూడా వుంది. కథ ప్రకారమే అందులో ముద్దు సన్నివేశం ఉంటుంది. ఇక నటిగా భిన్నమైన పాత్రలు పోషించాలని ఉంది. తెలుగులో అమ్మాయిలకు ఛాన్సులు రావన్న అపవాదు నిజమే. ఎందుకంటే తెలుగు అమ్మాయి అయినందుకు నాకు కొన్ని అవకాశాలు పోయాయి. అయితే ఇక్కడ టాలెంట్ వుంటే మంచి అవకాశాలు వస్తాయని నాలాంటి వాళ్లం ప్రూవ్ చేస్తున్నాం. ఈ సినిమా తరువాత ఓ ప్రాజెక్టు చర్చల్లో వుంది. త్వరలోనే దాని గురించి తెలియజేస్తా అంటూ ముగించింది.