న్యూఢిల్లీ, మార్చి 29: న్యూజిలాండ్ క్రికెట్ కెప్టెన్ కేన్ విలియమ్‌సన్ ఐపీఎల్‌లో సన్‌రైజర్స్ హైదరాబాద్ జట్టుకు కొత్త కెప్టెన్‌గా నియమితుడయ్యాడు. దక్షిణాఫ్రికాతో జరిగిన ఒక మ్యాచ్‌లో బాల్ ట్యాంపరింగ్ వివాదంలో చిక్కుకున్న ఆస్ట్రేలియా క్రికెటర్ డేవిడ్ వార్నర్‌ను తప్పించడంతో అతని స్థానంలో విలియమ్‌సన్‌ను కెప్టెన్‌గా ప్రకటించినందుకు ఆనందంగా ఉందని సన్‌రైజర్స్ హైదరాబాద్ ఫ్రాంచైజీ సీఈఓ షణ్ముగం తెలిపాడు.

పెర్త్, మార్చి 29: బాల్ ట్యాంపరింగ్ విషయంలో తాను అబద్ధం చెప్పానని ఈ సంఘటన పాత్రధారి కామెరాన్ బాన్‌క్రాఫ్ట్ అంగీకరించాడు. దక్షిణాఫ్రికాతో మూడో టెస్టు జరుగుతున్నప్పుడు, మూడో రోజు ఆట సమయంలో అతను బంతి ఆకారాన్ని మార్చడానికి ప్రయత్నిస్తున్న దృశ్యం కెమెరాల్లో చిక్కింది.

సిడ్నీ, మార్చి 29: తన వల్ల యావత్ క్రికెట్‌పై చెరగని మచ్చ పడిందని బాల్ ట్యాంపరింగ్ సూత్రధారి, ఆస్ట్రేలియా ఓపెనర్ డేవిడ్ వార్నర్ ఆవేదన వ్యక్తం చేశాడు. చిన్నతనం నుంచీ తనకు క్రికెట్ అంటే ఎంతో అభిమానమని, అలాంటి క్రీడకు తనవల్ల చెడ్డపేరు వచ్చిందని వాపోయాడు. జీవితంలో మరచిపోలేని పొరపాటు చేశానని, ప్రస్తుత పరిస్థితుల్లో భవిష్యత్తుపై ఎలాంటి వ్యాఖ్యలు చేయలేనని సోషల్ మీడియాలో పోస్టు వివరణలో స్పష్టం చేశాడు.

ముంబయి, మార్చి 29: టీ-20 ముక్కోణపు సిరీస్‌లో వైఫల్యాల బాటలో నడుస్తూ ఫైనల్ చేరలేకపోయన భారత మహిళా క్రికెట్ జట్టు ఎట్టకేలకు ఓ విజయంతో పరువు నిలబెట్టుకుంది. ఇక్కడి బ్రబోర్న్ స్టేడియంలో జరుగుతున్న టీ-20లో భాగంగా గురువారం ఇంగ్లాండ్‌తో జరిగిన తన చివరి గ్రూప్ మ్యాచ్‌లో భారత్ 8 వికెట్ల తేడాతో ఘన విజయం సాధించి, ఊరట చెందింది.