పెదవేగి/ద్వారకాతిరుమల, సెప్టెంబర్ 25 : ఒలింపిక్ క్రీడల్లో భారత్ కీర్తి ప్రతిష్ఠలను ప్రపంచానికి ఇనుమడింపచేసిన బ్యాడ్మింటన్ క్రీడాకారిణి సింధు ఆదివారం రాత్రి పశ్చిమగోదావరి జిల్లా పెదవేగి మండలం రాట్నాలకుంటలో వేంచేసియున్న శ్రీ రాట్నాలమ్మ అమ్మవారికి, ద్వారకాతిరుమలలో చినవెంకన్నకు విశేష పూజలు నిర్వహించారు.

రాజమహేంద్రవరం, సెప్టెంబర్ 25: గోదావరి నది వరద నీటితో పరవళ్లు తొక్కుతోంది.మరో మూడు రోజుల్లో గోదావరి ఉద్ధృతి పెరగనుందని జల వనరుల శాఖ అధికారులు అంచనా వేస్తున్నారు. ఈలోగా అవసరమైన అప్రమత్త చర్యలు చేపట్టేందుకు యంత్రాంగం సిద్ధమైంది. ప్రస్తుతం కాళేశ్వరం వద్ద రెండు మీటర్ల వరకు నీటి మట్టం పెరిగింది. ఇక్కడ పెరిగిన నీటిమట్టం ధవళేశ్వరం వద్దకు చేరాలంటే మరో రెండు రోజులు పడుతుందని అధికారులు అంచనా వేశారు.

తిరుపతి, సెప్టెంబర్ 25: వేద విద్యను అభ్యసించడం పూర్వజన్మ సుకృత ఫలమని, ప్రతి వేద విద్యార్థి ఈ అవకాశాన్ని సద్వినియోగం చేసుకోవాలని ఉమ్మడి రాష్ట్రాల గవర్నర్ నరసింహన్ వేద విద్యార్థులకు హితవుపలికారు. ఆదివారం వేద విశ్వవిద్యాలయానికి విచ్చేసిన ఆయన విద్యార్థులతో ముఖాముఖి చర్చించారు. వేదాలను అభ్యసిస్తున్న విధానాన్ని ఆయన విద్యార్థులను అడిగి తెలుసుకున్నారు.

తిరుపతి, సెప్టెంబర్ 25: రాష్ట్ర డిజిపి సాంబశివరావు ఆదివారం తిరుపతి కమాండ్ కంట్రోల్‌ను తనిఖీచేశారు. కొద్దిరోజుల్లో తిరుమలలో శ్రీవారి బ్రహ్మోత్సవాలు జరుగనున్న నేపథ్యంలో తిరుమలకు భక్తుల తాకిడి ఎక్కువగా ఉండే పరిస్థితుల్లో ఎలాంటి అవాంఛనీయ సంఘటనలు జరగకుండా చూడాలని ఈ సందర్భంగా డిజిపి సూచించారు. వీలైనంత వరకు సిసి కెమెరాలను అవసరమైన ప్రదేశాలలో ఏర్పాటుచేయాలని తెలిపారు.