వెల్లింగ్టన్, నవంబర్ 13: ఆదివారం తెల్లవారు జామున న్యూజిలాండ్ దక్షిణ దీవి ప్రాంతంలో పెను భూకంపం సంభవించింది. రిక్టర్ స్కేలుపై 7.8పాయింట్ల తీవ్రతతో నమోదైన ఈ భూకంపం కారణంగా స్వల్పస్థాయి సునామీ హెచ్చరికలు జారీ అయ్యాయి. తీవ్ర స్థాయిలో భవనాలకు నష్టం వాటిల్లింది. సునామీ ముంపునకు గురి కాకుండా తీర ప్రాంత ప్రజలను అత్యవసరంగా ఎగువ ప్రాంతాలకు తరలించారు. ఎమర్జెన్సీ సర్వీసులను అందుబాటులోకి తెచ్చారు.

టోక్యో, నవంబర్ 12: జపాన్ పర్యటనలో ఉన్న ప్రధాని నరేంద్ర మోదీ శనివారం ఆ దేశ ప్రధాని షింజే అబెతో కలిసి బులెట్ ట్రైన్‌లో ప్రయాణం చేశారు. జపాన్‌లోని ప్రఖ్యాత హైస్పీడ్ రైలు షింకన్‌సేన్ బులెట్ రైల్లో టోక్యోనుంచి ఒసాకా తీరంలోని కోబె నగరం దాకా ప్రయాణించారు. అబెతో కలిసి బులెట్ రైల్లో ప్రయాణించిన ఫోటోను మోదీ ట్విట్టర్‌లో పెట్టారు. విదేశాంగ శాఖ ప్రతినిధి వికాస్ స్వరూప్ కూడా ఈ ఫోటోలను ట్విట్టర్‌లో ఉంచారు.

వాషింగ్టన్, నవంబర్ 11: అమెరికా ఇమ్మిగ్రేషన్ వ్యవస్థను సంస్కరించడానికి కొత్తగా అధ్యక్షుడిగా ఎన్నికయిన డొనాల్డ్ ట్రంప్ పాలనాయంత్రాంగం పది సూత్రాల కార్యాచరణ ప్రణాళికను అమలు చేయనుంది. మెక్సికో సరిహద్దులో గోడ నిర్మించడం, కొన్ని దేశాలకు చెందిన వారికి వీసాలు ఇవ్వకుండా నిలిపివేయడం వంటివి ఈ ప్రణాళికలో ఉన్నాయి. ట్రంప్ ట్రాన్సిషన్ టీమ్ శుక్రవారం ఈ విషయం వెల్లడించింది.

ఇస్లామాబాద్, నవంబర్ 11: భారత్ తరహాలోనే పెద్దనోట్లు రద్దుచేయాలని పాకిస్తాన్ ప్రజాప్రతినిధులు డిమాండ్ చేశారు. అవినీతి, నల్లధనం నిర్మూలించాలన్న ఉద్దేశంతో భారత ప్రభుత్వం 500,1000 రూపాయల నోట్లను రద్దుచేసింది. పాకిస్తాన్‌లోనూ 500,1000 రూపాయల నోట్లు రద్దుచేయాలని పాక్ పార్లమెంటులో ఆర్థిక వ్యవహారాల స్థాయి సంఘం సిఫార్సు చేసింది.