ముంచుకొచ్చిన గడువు

ముంబయి: భారీ మొత్తాల్లో రుణాలు తీసుకొని, సకాలంలో చెల్లించకుండా ఎగవేస్తున్న సుమారు 70 అతిపెద్ద కంపెనీలపై తుది నిర్ణయం తీసుకోవడానికి గడువు ముగింపు దశకు చేరుకుంది. దీనితో తుది నిర్ణయం కోసం బ్యాంకులు మల్లగుల్లాలు పడుతున్నాయి. రిజర్వ్ బ్యాంకు ఇచ్చిన గడువు సోమవారం నాటితో ముగియనుండడంతో, రాత్రికిరాత్రి చర్చలు పూర్తి చేసి, తెల్లవారిన తర్వాత నివేదికను ఇవ్వాల్సి ఉంటుంది. సుమారుగా 70 భారీ కంపెనీల నుంచి వివిధ బ్యాంకులకు 3.8 లక్షల కోట్ల రూపాయలు రావాల్సి ఉంది. ఈ కంపెనీలను దివాలా సంస్థలుగా ప్రకటించాలని జాతీయ కంపెనీ లా ట్రిబ్యూనల్ (ఎన్‌సీఎల్‌టి)ను కోరాలా? వద్దా? అనే విషయాన్ని తేల్చుకోవడానికి సంబంధిత బ్యాంకులకు ఆరు నెలల గడువు ఇచ్చింది. చర్చలు జరిపి, నిర్ణయం తీసుకోవడానికి ఏర్పడిన బ్యాంకర్ల కమిటీ పలుమార్లు సమావేశమైంది. కానీ, ఇప్పటి వరకూ తుది నిర్ణయానికి రాలేకపోయింది. సోమవారం సాయంత్రానిలోగా రిజర్వ్ బ్యాంకుకు తీర్మానాన్ని వెల్లడించాల్సి ఉంది. ఒకవేళ తీర్మానాన్ని అందచేయకపోతే, ఈ కంపెనీల దివాలా ప్రక్రియను ప్రారంభించాల్సిందిగా ఎన్‌సీఎల్‌టీని రిజర్వ్ బ్యాంకు కోరుతుంది. నిజంగానే ఎన్‌సీఎల్‌టీ పరిధిలోకి వెళితే, విపరీతమైన జాప్యం జరుగుతుందని, అంతేగాక, దివాలా ప్రకటన అనంతరం ఆస్తుల వేలం తదితర మార్గాల్లో వచ్చిన మొత్తాల్లోనూ భారీగా కోతలు తప్పవని బ్యాంకర్లు భయపడుతున్నారు. ఈ కారణంగా తుది నిర్ణయం తీసుకోవడానికి హడావుడి పడుతున్నారు. ఇలావుంటే, బ్యాంకులకు భారీ మొత్తాల్లో అప్పుపడిన కంపెనీల్లో ఎక్కువ శాతం విద్యుత్ లేదా దాని అనుబంధ రంగాల్లో ఉన్నవే ఎక్కువ. ఇంజనీరింగ్ ప్రొక్యూర్‌మెంట్ కన్‌స్ట్రక్షన్ (ఈపీసీ) కంపెనీలు కూడా బ్యాంకులకు కోట్లాది రూపాయలు బకాయి పడ్డాయి. ఆయా సంస్థల నుంచి తమకు రావాల్సిన బకాయిలను వసూలు చేసుకోవడానికి అవసరమైన ప్రక్రియలను యుద్ధ ప్రాతిపదిక మీద పూర్తి చేయాల్సి ఉంటుంది. అయితే, రిజర్వ్ బ్యాంకు ఆరు నెలల వ్యవధి ఇచ్చినప్పటికీ, ఇంత వరకూ తుది నివేదికను బ్యాంకుల కమిటీ తయారు చేయలేకపోయింది. చివరి క్షణాల్లో తీర్మానాలకు తుది రూపాన్నిస్తాయా లేక రిజర్వ్ బ్యాంకును మరింత గడువును కోరుతాయా అనే ప్రశ్నకు సమాధానం లభించాల్సి ఉంది. మొత్తం మీద తీర్మానానికి గడువు సోమవారంతో ముగుస్తుంది కాబట్టి, సాధ్యమైనంత వరకూ బ్యాంకులు నిర్ణయాన్ని ప్రకటించే అవకాశాలే ఎక్కువగా ఉన్నాయి.