కాలమూ - రాజ్యమూ

కాలం
ఎంత నిర్దయనో
రాలుతున్న పండుటాకునడగాలి

ప్రాయమున్నంతకాలం
ఎన్ని చిందులు వేసినా
పత్రాన్ని హరిత పతాకం చేస్తది!

పూల మధ్య
రసభరిత ఫలాల నడుమ
రాజ్య వైభవాన్ని అంటగడ్తది!

మండుటెండల్లో
పచ్చని గొడుగును చేసి
ప్రాభవాన్ని వెదజల్లుతది!

విస్తరిస్తున్న కొద్దీ
అమ్మతనాన్ని అంటగట్టి
అజరామరత్వాన్ని రాసిస్తది

ఆయువు తీరిందా
నిశ్శబ్దంగా తుంచేసి
గాలిని అంతిమ యాత్రకు పురమాయస్తది!

పక్షి ఆకాశమే సాక్షి
భూతల్లొక్కతే తన అంశను
తిరిగి తనలో లీనం చేసుకుంటది!

రాజ్యమూ అంతే
తలూపినంత కాలమే
నెత్తిన కిరీటం పెడ్తది!

ఒకసారి ముద్ర పడిందా
నీ దేశభక్తి నిరూపణకు
ఏ అగ్నిగుండమూ మద్దతు పలకదు!